Martın 23-ü mənə çox əziz olan dəyərli bir insanın - Rəfibəylilər nəslinin ağsaqqalı general Akif Rəfiyevin yuvarlaq ildönümü idi və bu münasibətlə axşam saatlarında baş tutacaq məclisə digər dostlar, qohumlar, yaxınlarla birgə mən də dəvətli idim.

Bir neçə saat sonra xaricə səfərimlə bağlı hava limanına gedəsi olsam da, bu yubiley axşamında iştirak etməsəydim heç düz alınmazdı.

Akif müəllimin 90 yaşı tamam olurdu, amma bu yubileyə ikinci bir yubiley də qovuşmuşdu.

Akif müəllim uzun illər Azərbaycanın müxtəlif rayon və şəhərlərində prokuror işləyib və gənc çağlarında başlanan bu çətin və məsuliyyətli yolun əvvəlində 30 yaşında ikən İsmayıllıdakı kabinetində yenicə oturduğu çağda Bakıdan zəng gəlir.

Və o zəng cavan prokuroru necə həyəcana gətirirsə, ləngimədən maşına əyləşib Bakıya yollanır.

Necə həyəcanlanmayaydı - 30 yaşlı prokurorun ilk övladı dünyaya gəlmişdi.

Həm də sanki gəlişini dəqiqiliyiylə "hesablayaraq" atasına ad günü hədiyyəsi kimi doğulmuşdu.

Və o vaxtdan hər il yaşlarını martın 23-də birgə bayram etdilər, yuvarlaq ildönümləri də öz yerində.

Arazın 10 yaşı ilə Akif müəllimin 40 yaşı, Arazın 20-si ilə atasının 50 illiyi, Arazın 30-u ilə atasının 60-şı necə qovuşmuşdusa, 2026-nın 23 martında da oğulun 60-ı ilə atanın 90-ı üst-üstə düşdü.

Beləcə, ikisinin birlikdə 150 yaşı tamam oldu.

Və bu 150 Rəfibəylilər nəslinin tarixi baxımından yetərincə rəmzi bir rəqəmdir.

Əsr yarım əvvəl - XIX yüzilin son rübündə köklü-köməcli Rəfibəylilər nəslinin övladları Azərbaycanı yeni zamana hazırlayan seçkinlər sırasında oldular.

XX yüzilin başlanğıcında xalqımız ən müxtəlif təhdidlərlə üzbəüz qalanda yenə Rəfibəylilər köksünü ilk irəli verənlərdən idilər.

Azərbaycan istiqlalı uğrunda mübarizələr başlananda da onlar əvvəlincilər sırasında idilər.

XX yüzildə Azərbyacanın həyatından yaxşılı-yamanlı nələr keçdisə, bir aynadakı kimi bu nəslin ömründə əks-sədalandı.

Vaxt imtahanlarından şərəflə çıxmış Rəfibəylilər nəsli şanlı yolunu bu gün də ləyaqətlə davam etdirir və Akif Rəfiyev babalarına xas dəyanət və qürurla şəcərənin önündə getməkdədir.

Əziz Akif müəllim, əziz Araz yuvarlaq ildönümləriniz mübarək olsun!

Əl-ələ verib 150-ni 200 edən gününüz gəlsin!