Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynovun təqdimatında Azərbaycan Televiziyasında "Millət təqvimi" verilişinin yeni buraxılışı tamaşaçılara təqdim edilib.

Arxiv materialları əsasında hazırlanmış veriliş 1902-ci ilin yanvarında Bakıda baş tutmuş ilk Şərq konsertinə həsr olunub.

Akademik Rafael Hüseynov bildirib ki, ilk Şərq konserti 1901-ci ilin yayında Şuşada təşkil edilub. 1902-ci il yanvarın 11-də isə Bakıda Hacı Zeynalabdin Tağıyevin teatrında məşhur xanəndələr Cabbar Qaryağdıoğlu, Keçəçioğlu Məhəmməd, Şəkili Ələsgər, Seyid Mirbabayev və başqalarının iştirakı ilə Şərq konserti keçirilib. Əbdürrəhim bəy Haqverdiyevin rəhbərliyi ilə keçirilmiş ilk Şərq konserti mədəniyyət tarixində mühüm hadisə olub. Əbdürrəhim bəy Haqverdiyev bu konsertə sadə konsert kimi baxmayıb, bu mərasimi milli vəzifə kimi düşünüb. 

Əbdürrəhim bəy Haqverdiyevin millət quruculuğu sahəsindəki fəaliyyətindən bəhs edən akademik Rafael Hüseynov ədibin Sankt-Peterburq həyatı, onun rəhbərliyi ilə təşkil edilmiş Şərq konsertinin tarixi, milli mənası barədə danışıb. O, 1902-ci il "Kaspi" qəzetində tarixi konsert haqqında ilk məqalənin dərc edildiyini bildirib. Qeyd edib ki, Əbdürrəhim bəy Haqverdiyev mədəniyyətimizə milli orkestr anlayışını, uşaqların ifasında xor anlayışını gətirib.

Diqqətə çatdırılıb ki, Şərq konsertində Ə.Haqverdiyev 12 nəfərdən ibarət ansamblı, el nəğmələrini ifa edən xor dəstəsini səhnəyə çıxarıb. Tarixi tədbir onun tərtib etdiyi “Azərbaycan toyu” musiqili tamaşası ilə başa çatdırılıb. Bu konsertlər Azərbaycanın professional musiqi mədəniyyətinin, xüsusilə də muğam sənətinin inkişafına və gələcəkdə opera sənətinin yaranmasına zəmin yaradıb. Eləcə də 20-ci əsrin əvvəllərində Bakıda milli oyanış və mədəni yüksəlişin rəmzi kimi tarixə düşüb. 

"Millət təqvimi"ni buradan izləyə bilərsiz.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.