Bakı Dövlət Universitetinin Nizami Gəncəvi adına Milli Azərbaycan Ədəbiyyatı Muzeyində təcrübə keçən tələbələrilə növbəti elmi seminar məşğələsi baş tutub.

Muzeyin “Ekspozisiya” şöbəsinin elmi işçisi Aygün Abbasquliyeva Şərqşünaslıq fakültəsinin tələbələrinə muzey binasının memari keçmişi və tarixi funksiyası haqqında ətraflı məlumat verib. O, bildirib ki, Ədəbiyyat Muzeyinin yerində 1850-ci illərdə birmərtəbəli karvansara fəaliyyət göstərirdi. Aygün xanım İçəri şəhəri əhatə edən Qala divarları yaxınlığında inşa edilmiş bu karvansaraya sonradan Bakı quberniyasının baş memarı Qasım bəy Hacıbababəyovun layihəsi ilə ikinci mərtəbənin də əlavə olunduğunu qeyd edib. Söylənilib ki, dövrünün mülki mühəndisi Aleksandr Nikitin binanın ikinci mərtəbəsində nəzərdə tutulmuş banket zalının da layihəsini hazırlamışdır. Mənbələrdə “Hacı Hacıağanın karvansarası” adı ilə məşhur olan bu məkan, 1915-ci ildə yeni zamanın tələbilə üçmərtəbəli “Metropol” oteli kimi fəaliyyət göstərmişdir.

Məruzəçi o tarixi faktı da vurğulayıb ki, 1918-1920-ci illərdə Azərbaycan Demokratik Respublikasının Nazirlər Kabineti məhz bu binadan həm yaşayış, həm də iş yeri kimi istifadə edib.

Bildirilib ki, dahi Azərbaycan şairi Nizami Gəncəvinin 800 illik yubileyinə hazırlıq ərəfəsində - 1939-cu ildə hökumət qərarı ilə bina Nizami Gəncəvinin həyat və yaradıcılığından bəhs edən muzeyə çevrilib.  

Elmi seminar məşğələsi tələbələrin sual və çıxışları ilə davam edib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.