Nizami Gəncəvi adına Milli Azərbaycan Ədəbiyyatı Muzeyində təcrübə keçən tələbələrlə aprelin 3-də növbəti elmi seminar məşğələsi keçirilib. 

“Molla Nəsrəddin” satirik məcmuəsinin yaradılmasının 120-ci ildönümünə həsr olunmuş elmi seminarda  jurnalın bəhs etdiyi mövzu istiqamətlərinə diqqət yetirilib.

Muzeyin “Məktəblərlə və ictimaiyyətlə iş” şöbəsinin müdiri, filologiya üzrə fəlsəfə doktoru Nəzmiyyə Yigitoğlu “Molla Nəsrəddin” məcmuəsinin yaranma dövrü və mühərrirləri haqqında məlumat verib, dərginin o zamankı erməni-müsəlman qırğınları haqqında nəşr etdirdiyi felyetonlara diqqəti yönəldib.

Məruzəçi qeyd edib ki, “XX əsrin əvvəllərində erməni milləti, erməniçilik mühiti haqqında məlumatlara Cəlil Məmmədquluzadənin publisistik yazılarında olduğu kimi “Molla Nəsrəddin”in səhifələrində də az rast gəlmirik”.

Vurğulanıb ki, bunun əsas səbəbi yazıçının uzun illər yaşadığı Tiflis şəhərində “Şeytanbazar” müsəlman məhəlləsi ilə yanaşı “Naqornıy” və s. erməni məhəllələrinin olması ilə bağlı idi.  

Bildirilib ki, Mirzə Cəlilin milli, zehni oyanışa səsləyən qələmi , siyasi istibdadın xalqları mütilikdə saxlamaq, üsyan edən səsləri batırmaq üçün bu iki Qafqaz xalqını bir-birinə qarşı qaldırmaq planını ən bariz şəkildə anlatmağa çalışırdı.

Nəzmiyyə xanım daha sonra qeyd edib ki, “Molla Nəsrəddin” erməni-müsəlman savaşının yenicə tüğyan etdiyi 1905-ci il qırğınlarının mərkəzində - Tiflisdə yaranmışdı. Mirzə Cəlil, Ömər Faiq birinci nömrədən başlayaraq qırğının səbəblərini yavaş-yavaş açır, sırası gəldikcə yazır, nəticələrinə dair şəkillər çəkir, işin iç üzünü aşkara çıxarırdılar.

İstər, 1905-1906, istərsə də 1918-ci ilin erməni-müsəlman qırğınlarını, qaçqınlıq, didərginlik faciələrini səhəfələrində faktlarla işıqlandıran “Molla Nəsrəddin”in “Keçən günlər”, “Ot”, “Axund ilə keşişin vəzi” və digər felyetonları məhz bu tarixi hadisələrə həsr olunmuşdur.

Elmi seminar məşğələsi tələbələrin sual və çıxışları ilə davam edib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.