Bakı Şəhər Mədəniyyət Baş İdarəsinin tabeliyində olan Səbail rayon Mərkəzləşdirilmiş Kitabxana Sisteminin Mərkəzi Kitabxanasında detektiv yazıçı, nasir və publisist, Azərbaycan Respublikasının Xalq yazıçısı Çingiz Abdullayevin “Riyakarın iflası” adlı romanının təqdimat mərasimi keçirilib. Əsəri Azərbaycan dilinə tərcüməçisi Ədəbiyyat muzeyinin əməkdaşı Münisə Dadaşqızı, redaktoru isə muzeyin əməkdaşı, filologiya üzrə fəlsəfə doktoru Təbəssüm Muxtarovadır.

Tədbirdə Xalq yazıçısı Çingiz Abdullayev, Kitabçılar Birliyinin rəhbəri, Azərbaycan Yazıçılar Birliyinin üzvü, şairə Esmira Abdullayeva, Nizami Gəncəvi adına Milli Azərbaycan Ədəbiyyatı muzeyinin əməkdaşları – filologiya üzrə fəlsəfə doktorları İlhamə Gültekin, Nuranə Əsədullayeva, Təranə Rüstəmova, Sevinc Heydərova, kulturologiya üzrə fəlsəfə doktoru Nailə Əliyeva, elmi işçilər Törəxanım Hüseynova, Məlahət Hətəmova, eləcə də yazıçının yaradıcılığını sevən və daim izləyən fəal oxucular iştirak ediblər.

Görüş zamanı Azərbaycan ədəbiyyatının dünyada tanıdılmasında xüsusi rolu olan Çingiz Abdullayevin yaradıcılığı geniş şəkildə təhlil olunub. Yazıçının əsərlərindəki obrazlar, xüsusilə də Azərbaycanı dünya oxucularına tanıdan məşhur “Dronqo” obrazı haqqında ətraflı söhbət açılıb, onun əsərlərində irəli sürdüyü fikir və ideyalar müzakirə edilib. Tədbir iştirakçılarını maraqlandıran suallar müəllif tərəfindən ətraflı cavablandırılıb.

Sonda Xalq yazıçısı fəal oxuculara imzalı kitablarını hədiyyə edib.

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.