Kürdəmir şəhəri Sadiq Əlihedərov adına 4 nömrəli tam orta məktəbin V sinif şagirdlərinə Nizami Gəncəvi adına Milli Azərbaycan Ədəbiyyatı Muzeyinin Xaqani Şirvani adına Aran regional filialında növbəti açıq dərs keçirilib.

Açıq dərs dahi Azərbaycan şairi və mütəfəkkiri Nizami Gəncəvinin yaradıcılığına həsr olunub.

İlk olaraq filialın müdiri, filologiya üzrə fəlsəfə doktoru Yaqut Bahadurqızı dünya ədəbiyyatının qızıl dövrü hesab edilən intibah dövrü Şərq ədəbiyyatının görkəmli nümayəndəsi Nizami Gəncəvinin dünya mədəniyyəti və ədəbiyyatı xəzinəsindəki rolu və bu xəzinəyə bəxş etdiyi sənət inciləri haqqında qısa məlumat verib, şagirdləri dahi şairə aid olan ekspozisiya ilə tanış edib.

Məktəbin dil-ədəbiyyat müəllimi Zinyət Umudova isə məktəblilərə Nizami Gəncəvinin zəngin irsindən bəhs edib, şairin yaradıcılığının əsas xüsusiyyətlərini izah edib. Şagirdlər ədibin poeziyasından nümunələr söyləyərək onun yaradıcılığına olan maraqlarını nümayiş etdiriblər.

Dərs zamanı məktəblilər şairin məşhur “Sirlər xəzinəsi” poemasından  “Kərpickəsən qocanın hekayəti”ni səhnələşdirərək təqdim ediblər. Şagirdlər, həmçinin, böyük şairin digər əsərlərindən parçalar səsləndirib, Nizami yaradıcılığına dair sual-cavab bölümündə fəal iştirak ediblər.

Daha sonra muzey əməkdaşları şagirdlərə klassik Azərbaycan ədəbiyyatının müxtəlif dövrləri haqqında geniş məlumat verib, onları muzeydə qorunan eksponatlar, kitablar və tablolarla tanış edib.

Qeyd olunub ki, muzeydə açıq dərslərin keçirilməsi məktəblilərin ədəbiyyata marağının artırılması, keçdikləri mövzunu daha yaxşı qavramaları  baxımından mühüm əhəmiyyət daşıyır.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.