Nizami Gəncəvi adına Milli Azərbaycan Ədəbiyyatı Muzeyində təcrübə keçən tələbələrlə növbəti elmi seminar məşğələsi keçirilib.

Muzeyin Filiallarla iş üzrə direktor müavini Ləman Muxtarova Azərbaycan Xalq Cümhuriyyəti Parlamentinin üzvlərindən biri olmuş şair, pedaqoq, ictimai-siyasi xadim Hacıkərim Sanılı yaradıcılığı haqqında məruzə edib.

Ədibin uşaqlıq və təhsil illəri haqqında ətraflı məlumat verən Ləman xanım, onun 1918-ci ildə Azərbaycan Parlamentində Sosialistlər fraksiyasının üzvü kimi təmsil olunduğunu da qeyd edib. Bildirilib ki, ədibin mütərəqqi ideyaları vaxtilə mürtəce din xadimlərinin etirazına səbəb olsa, müəllimliyə başladığı illərdən təqiblərlə üzləşsə də Sanılı inqilabi mübarizəsini davam etdirir, kəndlilərin hüququnu müdafiə edir, yeniliyə, tərəqqiyə aparan nümayişlərdə iştirak edirdi.

Daha sonra bildirilib ki, kövrək qəlbli  şair, kəndlilərin abadlıq içərisində yaşamasının, təhsil almasının tərəfdarı olmuş, qadınların maariflənməsinə xüsusi diqqət göstərərək bunun üçün hər zaman mübarizə aparmışdır.

Məruzəçi onu da diqqətə çatdırıb ki, Hacı Kərim Sanılı bütün yaradıcılıq ruhu ilə Azərbaycan kəndi və kənd həyatının ən mahir tərənnümçüsü olmuş, dövrün tənqidçiləri onun haqqında, “kənd ədəbiyyatının öndə gedən nümayəndəsi”, deyə  bəhs etmişlər.

Bildirilib ki, 1922-ci ilin mart ayında Məclisi-Məbusanın maarifçi üzvlərindən “Yeni Əlifba Komitəsi” və komissiyası yaradılmışdır. Latın əlifbasının əsaslarını öyrənmək işini Sanılı öz üzərinə götürmüş və  çox keçmədən "Böyüklər üçün əlifba kitabı" dərsliyini yazaraq komissiyaya təqdim etmişdir.

Ləman xanım qeyd edib ki, Sovet hakimiyyətinin yarandığı ilk illərdə ərsəyə gəlmiş ilk Azərbaycan tairixi poeması da Sanılıya məxsusdur. O, ilk poeması olan "Aran köçü" əsərində yaylaq həyatının bütün incəliklərini, göz oxşayan təbiətini, çobanların sevincini, ağrı-acısını bədii lövhələrlə təsvir etmişdir.

Seminar məşğələsi tələbələrlə sual-cavab şəklində davam etmiş, ictimai-siyasi xadim Hacı Kərim Sanılının XX əsr tariximizdəki siyasi fəaliyyətinə, o cümlədən, repressiya illərinin qurbanı olması faktına da toxunulmuşdur.

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.