Sankt-Peterburq şəhərindəki Dövlət Ermitajı Muzeyində hər il ənənəvi olaraq təşkil edilən “Muzey və mədəni turizmin problemləri” mövzusunda XXIV dəyirmi masa keçirilib. Tədbirdə Nizami Gəncəvi adına Milli Azərbaycan Ədəbiyyatı Muzeyinin əməkdaşları ölkəmizi təmsil edib.

Hibrid formatda baş tutan tədbir geniş coğrafiyanı əhatə edib. Diskussiyalara Azərbaycanla yanaşı, Rusiya, İtaliya, Böyük Britaniya, Qırğızıstan və digər ölkələrin tanınmış alimləri, muzey mütəxəssisləri qatılıblar.

Tədbirdə Nizami Muzeyinin Beynəlxalq əlaqələr və dünya muzeyləri şöbəsinin müdiri, kulturologiya üzrə fəlsəfə doktoru Nailə Əliyeva məruzə ilə çıxış edib. O, “Süni intellektin muzey işində tətbiqi” mövzusunda çıxış edərək, müasir texnologiyaların bu sahədəki rolunu vurğulayıb. Bildirib ki, süni intellekt əsaslı sistemlər eksponatların rəqəmsallaşdırılmasına və muzey təcrübəsinin daha interaktiv olmasına geniş imkanlar açır. Bu texnologiyalar sayəsində muzeylər həm maarifləndirici, həm də texnoloji baxımdan daha cəlbedici məkanlara çevrilir.

Muzeyin böyük elmi işçisi, filologiya üzrə fəlsəfə doktoru Sevinc Heydərova isə “Audio müşayiət müasir muzey işinin əhəmiyyətli hissəsi kimi” mövzusunda fikirlərini bölüşüb. S. Heydərovanın çıxışında muzeylərin “səssiz məkan” anlayışından çıxaraq “danışan məkan”a çevrilməsi prosesi təhlil edilib. Məruzəçi qeyd edib ki, müasir ziyarətçi yalnız görmək deyil, həm də hiss etmək istəyir. Musiqili tərtibat vizual materialları tamamlayaraq ziyarətçidə daha dolğun və emosional təəssürat yaradır. O, həmçinin muzey məkanında təşkil olunan ədəbi-musiqili tədbirlərin ziyarətçi məmnuniyyətinə müsbət təsirini diqqətə çatdırıb.

Muzeyşünaslığın inkişafı və bu sahə üzrə yeniliklərin müzakirə edildiyi dəyirmi masa maraqlı məruzələrlə yadda qalıb. Tədbirin sonunda iştirakçılar üçün “Akademik incəsənətin xaricində” adlı səyyar sərgiyə baxış keçirilib.

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.