29 aprel 2026-cı il tarixində Xəzər Universitetində Xəzər Universiteti Mövlana Ədəbi-Fəlsəfi Araşdırmalar İnstitutu, Qafqaz Universiteti Əbülhəsən Xərəqani Araşdırma Mərkəzi və Buxara Beynəlxalq Universitetinin birgə təşkilatçılığı ilə “I. Uluslararası Türk Dünyasında Kültür ve Degerlerin izleri”   beynəlxalq elmi simpoziumu keçirilmişdir.

Elmi simpozium  türk dünyasında elm, mədəniyyət, din, fəlsəfə, sosiologiya, tarix, arxeologiya, dil və ədəbiyyatla bağlı müxtəlif problemlərə həsr  olunmuşdur. Simpoziumda 11-i üz-üzə, 5-i distant olmaqla 16 panel iclasında 150-dək məruzə dinlənilmişdir.

Nizami Gəncəvi adına Milli Azərbaycan Ədəbiyyatı muzeyinin “Beynəlxalq əlaqələr və dünya muzeyləri” şöbəsinin böyük elmi işçisi, fil.ü.f.d. Gülnar Əqiq simpoziumda “Şeyx Əbülhəsən Xərəqaninin və Mahmud Şəbüstərinin  təsəvvüf düşüncəsində ortaq məqamlar” mövzusunda məruzə ilə çıxış edib. O, X-XI əsrlərdə yaşamış məşhur mütəsəvvif alim Şeyx Əbülhəsən Xərəqaninin görkəmli Azərbaycan sufi şairi Mahmud Şəbüstərinin irfani-fəlsəfi dünyagörüşünün formalaşmasına təsir göstərdiyini qeyd edərək, bu təsirin xüsusilə Şəbüstərinin “Gülşəni-raz” məsnəvisində təzahür etdiyini vurğulamışdır. Məruzəçi bildirmişdir ki, “Gülşəni-raz” məsnəvisində qoyulan suallara verilən cavablarda Şəbüstərinin öz böyük sələfi Xərəqani ilə həmfikir olduğu meydana çıxır. O, qeyd etmişdir ki, “Gülşəni-raz” əsərinin təhlili, vəhdəti-vücud, ilahi həqiqətin dərk olunması, nəfsin tərbiyəsi və insanın kamillik mərhələləri kimi fundamental məsələləri əhatə edən suallara verilən irfani-fəlsəfi məzmunlu cavabları Şəbüstərinin irfani baxışlarının Əbülhəsən Xərəqaninin ilə üst-üstə düşdüyünü göstərir.

Simpoziumun sonunda müzakirələrin yekun iclası keçirildi və iştirakçılara sertifaktlar təqdim edildi.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.