İstanbul Böyükşəhər Bələdiyyəsi Mədəniyyət Müdiri Hüseyn Sərt Nizami Gəncəvi adına Milli Azərbaycan Ədəbiyyatı Muzeyinin qonağı olub.

Qonağı zəngin və  maraqlı ekspozisiya ilə muzeyin böyük elmi işçisi, filologiya üzrə fəlsəfə doktoru Sevinc Heydərova tanış edib. Təqdimat zamanı Azərbaycan ədəbiyyatının qədim dövrlərindən müasir mərhələsinə qədər keçdiyi tarixi yol, klassiklərimiz və ortaq türk ədəbi irsini əks etdirən nadir nümunələr barədə ətraflı məlumat verilib.

Xüsusilə muzeydə qorunan qədim nəşrlər, mütəfəkkirlərin həyat və yaradıcılığını əks etdirən şəxsi əşyalar qonağın böyük marağına səbəb olub. Muzeyin əməkdaşı ekspozisiyada yer alan nümunələrin təkcə Azərbaycanın deyil, bütövlükdə Türk dünyasının mənəvi yaddaşını özündə daşıdığını vurğulayıb.

Ziyarət sonunda Hüseyn Sərt muzeyin rəy kitabına ürək sözlərini yazaraq, burada aldığı təəssüratları yüksək qiymətləndirib. O, mənəvi bağlardan söz açaraq ekspozisiyada sərgilənən türk şairi Nazim Hikmətdən bəhs edib.

Sonra muzeyin tarixi və bədii əhəmiyyətini bu sözlərlə ifadə edib: “Qədim Azərbaycan və türk tarixinin ən qiymətli nümayəndələrinin əsərlərindən, həyatlarından bənzərsiz xatirələr saxlayan bu qiymətli muzeydə müstəsna məlumatlar əldə etdim. Bu mədəniyyət ocağında çox şey öyrəndim və zamanla unutduqlarımı yenidən xatırladım.”

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.