NizamiGəncəvi adına Milli Azərbaycan Ədəbiyyatı Muzeyinin “Doktorantura və elmi inkişaf” şöbəsinin elmi işçisi Rəhilə Sadıqova 1970-ci ildən bəri Türkiyədə fəaliyyət göstərən “Qübbəaltı akademiyası mədəniyyət və incəsənət vəqfi”nin (Kubbealtı Akademisi Kültür Ve Sanat Vakfı) mətnşünaslıq istiqamətində təşkil etdiyi məsafədən təhsil ‒ ixtisasartırma kursunda onlayn şəkildə iştirak etmiş və sertifikat almışdır.

Marmara Universiteti İncəsənət fakültəsində Osmanlı türkcəsi üzrə mütəxəssis ‒ İpək Dağlıoğlunun təqdim etdiyi təlimlər “Osmanlı türkcəsi: kitabələrin oxunması” mövzusunda baş tutmuşdur. 6 akademik saatdan ibarət olan kurs ərzində əməkdaşımız Osmanlı dövründə çap edilmiş müxtəlif materiallar, elanlar, rəsmi sənəd və əmrlər, o cümlədən fərqli xətt növləri ilə yazıya alınmış ədəbi nümunələr ilə tanış olmuş, qədim tikililər: mədrəsə, çeşmə, qəbirüstü abidələr üzərindəki kitabələrin oxu texnikasının mənimsənilməsinə dair bilik və bacarıqlara yiyələnmişdir.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.