5 May tarixində Nizami Gəncəvi adına Milli Azərbaycan Ədəbiyyatı Muzeyində Bakı Dövlət Universitetinin tələbələri ilə növbəti elmi seminar məşğələsi keçirilib.

Muzeyin “Doktorantura və elmi inkişaf” şöbəsinin elmi işçisi Günel Səfərova məruzə ilə çıxış edərək şair, şərqşünas, tərcüməçi Cəfər Rəmzinin həyat yolu, elmi fəaliyyəti haqqında geniş məlumat vermişdir. O, qeyd etmişdir ki, namizədlik  işini klassik fars ədəbiyyatının görkəmli nümayəndələrindən biri olan Yəğma Cəndəqinin (1781-1859) poetik irsinin araşdırılmasına həsr edən   alim  XIX və XX əsrlərdə yazıb-yaradan İran şairlərinin  bir çoxunun - Ədibül-Məmalik , Mirzə Hüseyn Kərimi, Vüsal Şirazi, Fətəli xan Səba, Seyid Məhəmməd Səhab İsfahani, Qaani Şirazi, Əbunəsr Şeybani, Rzaqulu xan Hidayət, Mirzə Məhəmmədəli xan Süruş, Ruhani, Fərruxi Yəzdi, Seyid Əşrəfəddin Gilani  və başqalarının yaradıcılıqları haqqında məqalələr yazmış, əsasən, fars şeirində satira problemini araşdırmışdır.

Günel xanım alimin elmi yaradıcılığına müraciət edərək “Vüsal Şirazi” adlı əsərində Qacarlar dövrünün şairlərindən olmuş Mirzə Məhəmməd Şəfi Vüsal Şirazinin həyat və yaradıcılıq yolunu işıqlandırmasından bəhs etmişdir.

Bildirilmişdir ki, Cəfər Rəmzinin Qacarlar dövrü ədəbiyyatının tanınmış şairlərindən biri, əslən  Ordubaddan  olan Seyid Məhəmməd Səhab İsfahaniyə, Qaani Şiraziyə və başqalarına həsr etdiyi məqalələr hər şeydən əvvəl ona görə maraq doğurur ki, bunlar ilk mənbələr əsasında yazılmış, gəlinən nəticələr faktların dili ilə əsaslandırılmışdır.

Elmi seminar məşğələsi tələbələrin sual və çıxışları ilə davam etmişdir.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.