Nizami Gəncəvi adına Milli Azərbaycan Ədəbiyyatı Muzeyində Ulu Öndər Heydər Əliyevin anadan olmasının 103-cü ildönümünə həsr olunmuş elmi sessiya keçirilib.

Əvvəlcə Azərbaycan Respublikasının Dövlət Himni səsləndirildib, Ümummili Lider Heydər Əliyevin və şəhidlərin əziz xatirəsi bir dəqiqəlik sükutla yad edilib.

Tədbiri giriş sözü ilə açan muzeyin direktoru, akademik Rafael Hüseynov Ulu Öndərin həyatını bütövlükdə xalqına, dövlətinə və milli maraqlara xidmət nümunəsi adlandırıb. Onun yalnız siyasi lider deyil, həm də müasir Azərbaycan dövlətçiliyinin memarı, strateji düşüncənin və uzaqgörən siyasətin simvolu olduğu bildirib. 

“Hər yeni günlə müasir” adlı məruzəsini təqdim edən akademik Rafael Hüseynov vurğulayıb ki, Heydər Əliyev bütün mahiyyəti ilə millət qurucusu olan dahi insandır. Ulu Öndərin uzaqgörən siyasəti müstəqil Azərbaycanın möhkəm əsaslar üzərində formalaşmasında həlledici rol oynayıb. O, fenomenal dövlətçilik zəkası, sarsılmaz iradəsi, böyük hədəflərə hesablanmış strateji qərarları ilə qazanılmış irəliləyişlər hesabına müstəqil Azərbaycan dövlətini böhrandan yeni inkişaf yoluna aparıb.

"Böyük şəxsiyyətlər haqqında danışmaq, xatirələrini yad etmək həm də onların içərisindən keçdiyi tarix haqqında düşünmək fürsəti verir", - deyən akademik Rafael Hüseynov Ulu Öndərin Azərbaycanın yalnız XX əsr tarixində deyil, milli tariximizin ən əvəzsiz, nadir şəxsiyyətlərindən biri olduğunu vurğulayıb. 

O, Heydər Əliyevin Azərbaycanın müstəqilliyini, istiqlalını məhv olmaqdan xilas etməsini, onu möhkəmləndirməsini dahi liderin Azərbaycan xalqı qarşısında ən böyük xidmətlərindən olduğunu diqqətə çatdırıb. Bildirib ki, Ulu Öndər siyasi və ideoloji nöqteyi-nəzərdən bir-birindən fərqli iki dövrdə - istər SSRİ dönəmində, istərsə də dövlət müstəqilliyinin bərpasından sonra respublikamıza uğurla rəhbərlik edərək dövlətimiz üçün taleyüklü məsələlərin həllinə nail olmaqla millətimizin parlaq gələcəyini təmin edib. Onun bütün xidmətlərinin fövqündə həmişə istiqlalımızı qorumaq, yaşatmaq, onu dönməz, əbədi etmək dayanıb.

Muzey direktoru Ümummilli Lider Heydər Əliyevin yüksək natiqlik qabiliyyəti, siyasi uzaqgörənliyi, cəsarəti və dövlət rəhbəri kimi müstəsna keyfiyyətlərindən başqa, həm də böyük mədəniyyət adamı olduğunu söyləyib. Vurğulayıb ki, Heydər Əliyev yaradıcı insanlara daim diqqət və qayğı ilə yanaşıb, milli mədəniyyətin inkişafına böyük töhfələr verib. Ulu Öndər Azərbaycan tarixində yalnız qüdrətli dövlət xadimi kimi deyil, həm də milli-mənəvi dəyərlərimizin qoruyucusu, mədəniyyətimizin və incəsənətimizin əsl hamisi kimi əbədi yaşayır.

Akademik Rafael Hüseynov respublikamızda qazanılan bütün nailiyyətlərin Heydər Əliyev siyasətinin bəhrəsi olduğunu vurğulayıb. Əlavə edib ki, dahi liderin qurduğu yol, açdığı xətt davam etdirilir. O, Ulu Öndərin quruculuq missiyasının, strateji inkişaf kursunun bu gün onun layiqli davamçısı Azərbaycan Respublikasının Prezidenti İlham Əliyev tərəfindən uğurla davam etdirildiyi deyib. Bildirib ki, dövlətimizin başçısı Ümummilli Liderin bütün ümidlərini reallığa çevirməklə tarixi nailiyyətlərə imza atıb. Onun rəhbərliyi ilə Azərbaycan daha da güclənib, müstəqilliyimiz möhkəmlənib, ölkəmizin sosial-iqtisadi potensialı artıb, güclü ordumuz yaradılıb və bu güc sayəsində torpaqlarımız işğaldan azad edilərək, Azərbaycanın ərazi bütövlüyü və suverenliyi tam təmin olunub. Bu gün Heydər Əliyevin ideyaları yaşayır və onun müəyyən etdiyi yol ölkəmizi daha böyük uğurlara, daha güclü Azərbaycana aparır.

O, gələcəklər içərisində də Ulu Öndərin həmişə Azərbaycan xalqı ilə birgə olacağını, Heydər Əliyevin xatirəsinin xalqımızın qəlbində əbədi yaşayacağını qeyd edib.

Daha sonra muzeyin digər əməkdaşları məruzələrlə çıxış ediblər.

Filologiya üzrə fəlsəfə doktoru Sevinc Heydərova “Heydər Əliyev ideologiyasında ana dili və milli kimlik” adlı məruzəsində Ulu Öndərin dil siyasəti və milli-mədəni irsin qorunması istiqamətlərində həyata keçirdiyi tarixi xidmətlərdən bəhs edib.

Filologiya üzrə fəlsəfə doktoru Nəzmiyyə Yigitoğlu Heydər Əliyevin bədii ədəbiyyatda yaradılmış obrazlarını araşdıraraq şair, dramaturq Hidayət Orucovun “Burdan min atlı keçdi” pyesini təhlilə cəlb edib. Elmi sessiyada eyniadlı tamaşadan fraqment nümayiş olunub.

Sənətşünaslıq üzrə fəlsəfə doktoru Gülsəba Həsənova isə “Azərbaycanın muzey quruculuğunda Heydər Əliyevin rolu” məruzəsini təqdim edərək bildirib ki, Heydər Əliyevin muzeyşünaslıq sahəsi üzrə imzaladığı qərarlarda bu sahə üzrə elmi-tədqiqat işlərinin aparılması, ekspozisiyaların yenidən qurulması və təkmilləşdirilməsi, xarici ölkələrdə sərgilərin təşkili məsələləri xüsusi yer alıb.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.