Yazıçılar Birliyinin Şüvəlandakı Yaradıcılıq Evində "Yüksəliş" müsabiqəsinin iştirakçıları və qalibləri ilə görüş keçirilib.

Təqribən 3 saat davam edən görüşdə gəncləri maraqlandıran suallar ətrafında fikir mübadilələri aparılıb.

Görüşdə Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynov gənc və perspektivli peşəkarların ölkənin inkişafında mühüm rol oynadığını vurğulayıb. Bildirib ki, müasir dövrdə təşəbbüskar, innovativ düşüncəyə malik və yüksək məsuliyyət hissi daşıyan kadrların formalaşdırılması strateji prioritetdir.  

 

Qeyd edək ki, “Yüksəliş” müsabiqəsi Prezidenti İlham Əliyevin 26 iyul 2019-cu il tarixli Sərəncamı ilə təsis edilmiş, Azərbaycan Respublikasının Birinci vitse-prezidenti Mehriban xanım Əliyevanın dəstəyi ilə keçirilir.

 

Müsabiqənin Təşkilat Komitəsinə Azərbaycan Respublikası Prezidentinin Administrasiyasının Humanitar siyasət, diaspor, multikulturalizm və dini məsələlər şöbəsinin müdiri Fərəh Əliyeva rəhbərlik edir və tərkibdə Azərbaycan Respublikası Prezidentinin köməkçisi Anar Ələkbərov, Xarici İşlər Naziri Ceyhun Bayramov, İqtisadiyyat naziri Mikayıl Cabbarov, Maliyyə naziri Sahil Babayev, Gənclər və İdman naziri Fərid Qayıbov, Elm və Təhsil naziri Emin Əmrullayev, Dövlət İmtahan Mərkəzinin Direktorlar Şurasının sədri Məleykə Abbaszadə, Millət vəkili Ülvi Quliyev, İctimai Televiziya və Radio Yayımları Şirkətinin baş direktoru Balakişi Qasımov, “Yüksəliş” müsabiqəsinin işçi qrupunun rəhbəri gənclər və idman nazirinin müavini Fərhad Hacıyev də var.

“Yüksəliş” çalışdığı sahədə intellektual səviyyəsi və idarəetmə bacarıqları ilə fərqlənən potensialları üzə çıxaran və Kadr Bankının yaradılmasını təmin edən müsabiqədir. Müsabiqədə 21-51 yaş arası, ali təhsilli, minimum 2 illik idarəetmə təcrübəsinə malik olan Azərbaycan Respublikasının vətəndaşları iştirak edirlər.

Aparılan araşdırmalar nəticəsində, Harvard Universitetinin “Manage Mentor” liderlik proqramı üçün hazırladığı 43 kompetensiya əsasında “Yüksəliş” müsabiqəsinin 9 kompetensiyadan ibarət qiymətləndirmə modeli yaradılıb, strateji düşünmə bacarığı, iş icrasının idarəedilməsi bacarığı, nəticələrə yönəlmə bacarığı, komandada işləmə bacarığı, kommunikasiya bacarıqları, dəyişikliklərin idarəedilməsi bacarığı, büdcənin idarəedilməsi bacarığı, sosial məsuliyyət və innovativlik kimi məziyyətlər ölçü meyarı kimi götürülür. Bu kompetensiyalar Davos İqtisadi Forumunun müəyyənləşdirdiyi və 2050-ci ilə kimi gələcəyin idarəçilərinin sahib olmalı olduğu səriştələri əhatələyir.

2019-2025-ci illər ərzində “Yüksəliş” müsabiqəsinin 5 mövsümü baş tutub, 39 536 nəfər qeydiyyatdan keçib, ümumilikdə isə 69 963 müraciət (təkrar iştirak edənlərlə birgə) qeydə alınıb. 5 müsabiqə nəticəsində 116 nəfər qalib statusu qazanıb.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.