Nizami Gəncəvi adına Milli Azərbaycan Ədəbiyyatı Muzeyində təcrübə keçən Bakı Dövlət Universiteti` Şərqşünaslıq fakültəsinin İran filologiyası ixtisası üzrə təhsil alan tələbələr üçün yekun seminar tədbiri təşkil olunub.

Muzeyin Doktorantura və elmi inkişaf şöbəsinin böyük elmi işçisi, filologiya üzrə fəlsəfə doktoru Sevinc Heydərova “Milli mətbuat kontekstində Azərbaycan qadınının intibah tarixi” mövzusunda elmi məruzə ilə çıxış edib.

Məruzədə XIX əsrin sonu – XX əsrin əvvəllərində Azərbaycan milli mətbuatının qadınların ictimai-siyasi oyanışında və milli intibah prosesində oynadığı mühüm roldan bəhs olunub. Bildirilib ki, Azərbaycan milli mətbuatının banisi Həsən bəy Zərdabinin nəşr etdirdiyi “Əkinçi” qəzeti ilə başlayan maarifçilik hərəkatı qadın azadlığı və təhsili məsələlərinin ictimai müzakirəyə çıxarılmasına geniş imkan yaradıb.

Məruzəçi Şərqin ilk qadın qəzeti olan “İşıq” qəzetinin qadınların təhsili və hüquqi bərabərliyi uğrunda apardığı mübarizədən danışıb. Qəzetin baş redaktoru Xədicə Əlibəyova, eləcə də Şəfiqə Əfəndizadə və Həmidə Cavanşir kimi ziyalı qadınların fəaliyyəti fonunda Azərbaycan qadınının 1919-cu ildə seçki hüququ qazanmasının tarixi əhəmiyyəti diqqətə çatdırılıb. Həmçinin bu ziyalı qadınların publisistika, maarifçilik və xeyriyyəçilik sahəsindəki xidmətləri xüsusi vurğulanıb.

Daha sonra Sevinc Heydərova “İşıq” qəzetinin davamı kimi nəşr olunan “Şərq qadını” jurnalının, sonrakı dövrdə isə “Azərbaycan qadını” jurnalının fəaliyyəti və Azərbaycan qadınının ictimai düşüncəsindəki rolundan bəhs edib.

Məruzədə bu il 125 illiyi qeyd olunan ilk dünyəvi Qızlar Məktəbinin yaranma tarixindən də danışılıb. Qeyd olunub ki, məktəbin əsas təşəbbüskarı və himayədarı xeyriyyəçi Hacı Zeynalabdin Tağıyev olsa da, onun fəaliyyətində və ideyasının formalaşmasında bir sıra maarifçi Azərbaycan qadınlarının da mühüm rolu olub. Bu baxımdan Hənifə Məlikova-Zərdabi, Sona xanım Tağıyeva və Nabat xanım Aşurbəyovanın xidmətləri diqqətə çatdırılıb.

Sonda müasir dövrdə qadınların elm, xüsusilə STEM sahələri və media mühitində qazandıqları uğurlardan, eləcə də Azərbaycan dövlətinin gender bərabərliyi və qadın siyasəti istiqamətində həyata keçirdiyi islahatlardan bəhs olunub.

Tədbir tələbələrin mövzu ətrafında apardıqları müzakirələr və çıxışlarla yekunlaşıb.

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.