Bakı Dövlət Universitetində tanınmış şərqşünas alim, BDU-nun Şərqşünaslıq fakültəsinin Orta Şərq dilləri kafedrasının dosenti, filologiya üzrə fəlsəfə doktoru Əsmətxanım Məmmədovanın 85 illik yubileyinə həsr olunan “Yaxın və Orta Şərq xalqlarının ədəbi-mədəni əlaqələrində ortaq abidələrin tədqiqi” mövzusunda respublika elmi konfransı keçirilib. 

Tədbiri giriş sözü ilə BDU-nun rektoru Elçin Babayev açıb.

Sonra görkəmli şərqşünas alim Əsmətxanım Məmmədovanın  həyat və fəaliyyətinə həsr olunmuş videoçarx nümayiş etdirilib.

Açılış mərasimində BDU-nun Şərqşünaslıq fakültəsinin dekanı Aydan Xəndan, Milli Məclisin Elm və təhsil komitəsinin sədri, BDU-nun kafedra müdiri Anar İsgəndərov, Milli Məclisin Ailə, qadın və uşaq məsələləri komitəsinin sədr müavini,  BDU-nun Türk filologiyası kafedrasının professoru Jalə Əliyeva, AMEA-nın müxbir üzvü Könül Bünyadzadə, Dövlət Sərhəd Xidməti Akademiyasının Azərbaycan dili və xarici dillər kafedrasının müdiri İlhamə Məmmədova, UNESCO üzrə Azərbaycan Respublikası Milli Komissiyasının birinci katibi Şahin Şabanov, Milli Məclisin deputatları Səyyad Aran və Aydın Mirzəzadə çıxış edərək Əsmətxanım Məmmədovanın şərəfli və mənalı ömür yoluna nəzər salıb, onun elmi və pedaqoji fəaliyyətinin gənc nəslin inkişafında mühüm rol oynadığını qeyd ediblər.

Milli Məclis sədrinin müavini, Nizami Gəncəvi adına Milli Azərbaycan Ədəbiyyatı Muzeyinin direktoru, Bakı Dövlət Universitetinin Orta Şərq dilləri və ədəbiyyatı kafedrasının professoru, akademik Rafael Hüseynov  konfransın açılış mərasimində nitq söyləyərək Əsmətxanım Məmmədovanın Bakı Dövlət Universitetində bu gün də davam edən səmərəli elmi-pedoqoji fəaliyyətindən və Azərbaycan şərqşünaslıq elminin inkişafındakı xidmətlərindən bəhs edib. Akademik qeyd edib ki, Əsmətxanım Məmmədova Azərbaycan şərqşünaslıq məktəbinin yetirməsi kimi bu sahəyə qiymətli töhfələr vermişdir. O, görkəmli şərqşünas alimlər Rəhim Sultanov, Mübariz Əlizadə, Həsən Mahmudov, Əhməd Şəfai, Neyyərzəman Hatəmi kimi  ustadlarının layiqli davamçısı olan Ə. Məmmədovanın əhatəli və fundamental tədqiqatları ilə şərqşünaslıq elmini zənginləşdirdiyini, xüsusilə fars dilçilik elmi ilə bağlı araşdırmalarının böyük əhəmiyyət daşıdığını, indiyədək dəfələrlə nəşr olunduğunu bildirib. Akademik R.Hüseynov çıxışında vurğulayıb ki, Əsmətxanım Məmmədovanın tədqiqatlarında nizamişünaslıq sahəsi xüsusi yer tutur. O, görkəmli alimin bu sahədəki uğurlarını yüksək dəyərləndirərək yorulmaz tədqiqatçı Əsmətxanım Məmmədovanı “Nizaminin yarıməsrlik həmsöhbəti” adlandırıb.

Çıxışlar zamanı alimin elmi-pedaqoji və ictimai xidmətlərinin dövlət tərəfindən yüksək qiymətləndirildiyi və onun “Qabaqcıl təhsil işçisi” fəxri nişanı, 3-cü dərəcəli “Əmək” ordeni, “Bakı Dövlət Universitetinin 100 illiyi (1919–2019)” yubiley medalı, Azərbaycan Yazıçılar İttifaqının “Qızıl Qələm” diplomu və müxtəlif fəxri mükafatlarla təltif edildiyi vurğulanıb.

Sonra Türkiyənin Ankara Universitetinin rektoru Necdat Ünüvarın, Şimali Kipr Yaxın Şərq Universitetinin propessoru Qadir Qolkariyanın videotəbrikləri səslənib.

Tədbirin sonunda Əsmətxanım Məmmədova Bakı Dövlət Universitetinin rəhbərliyinə və  konfrans iştirakçılarına dərin təşəkkürünü bildirib, onun həyat və yaradıcılıq yoluna həsr olunmuş “Zaman ölçülərinə sığmayan şərəfli ömür” adlı xatirələr toplusunun tərtibinə görə sevimli tələbəsi, akademik Rafael Hüseynova səmimi minnətdarlığını ifadə edib. O, ömrünü Azərbaycan elminə, gənclərin təlim və təhsilinə sərf etdiyinə görə iftixar hissi keçirdiyini, həyatının mənasını vətənə, dövlətə və xalqa sədaqətli xidmətdə gördüyünü qeyd edib.

Sonra konfrans iki bölmə üzrə on müxtəlif paneldə iştirakçıların çıxış  və müzakirələrilə davam etmişdir.

Nizami Gəncəvi adına Milli Azərbaycan Ədəbiyyatının əməkdaşları da konfransda iştirak edərək məruzələrlə çıxış ediblər.

 Muzeyin “Komparativistika və bədii tərcümə” şöbəsinin müdiri, fil.ü.e.d., professor Şəfəq Əlibəyli “Klassik farsdilli poeziyada cəvahirat adlarının poetik funksiyası (Nizami və Nəsimi yaradıcılığı əsasında)”, muzeyin elmi işlər üzrə direktor müavini, fil.ü.f.d. İlhamə Gültəkin ““Pançatantra” əsərinin tərcümələrinə motiv və  mövzu baxımından müqayisəli yanaşma”, “Elmi fondlar” şöbəsinin müdiri, fil.ü.f.d. Nərmin Əliyeva “Həbib Sahirin yaradıcılığında Fransa ədəbi mühitinin təsiri”, “Doktorantura və elmi inkişaf” şöbəsinin müdiri, fil.ü.f.d. Cəmilə Dəmirova “İbn Hamdis: dövr, şəxsiyyət və poeziya”, həmin şöbənin elmi işçisi Rəhilə Sadıqova ""Mürüc əz-Zəhəb va Mədain əl-Cauhər" əsərində "İpək yolu" anlayışının ifadə vasitələri", “Beynəlxalq əlaqələr və dünya muzeyləri” şöbəsinin böyük elmi işçisi, fil.ü.f.d. Gülnar Əqiq “Əsmətxanım Məmmədovanın araşdırmalarında nizamişünaslıq problemləri”, həmin şöbənin elmi işçisi Natəvan Bağırova “Əbu Dulamə şeirində Abbasi xəlifələri”, həmin şöbənin kiçik elmi işçisi Aysel Bayramova “Müasir farsdilli qəzəlin görkəmli nümayəndəsi – Simin Behbehani”, “Mədəni irs və mənbəşünaslıq” şöbəsinin elmi işçisi Aymən Həsənova “Mənzərə Məmmədovanın tədqiqatlarında Nizami əsərləri”, “Qədim və orta əsrlər Azərbaycan  ədəbiyyatının tədiqiqi və təqdimi” şöbəsinin elmi işçisi Aysel Məhərrəmova “Mədinə Gülgün yaradıcılığında təbiət lirikası: Xəzər motivləri”, “Ekspozisya” şöbəsinin kiçik elmi işçiləri Aygün Abbasquliyeva “Novruz Ağayevin Azərbaycan əlyazma irsinin toplanmasında və qorunmasında rolu”,  Aytən Məmmədova “Восточные мотивы в творчестве Александра Блока” (Aleksandr Blokun yaradıcılığında şərq motivləri) mövzularında məruzələr ediblər.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.