Nizami Gəncəvi adına Milli Azərbaycan Ədəbiyyatı Muzeyində Bakı Avrasiya Universitetinin Filologiya fakültəsinin tələbələri ilə ixtisas təcrübəsi çərçivəsində elmi seminar keçirilib.

Məruzəçi – filologiya elmləri doktoru, professor Mahirə Hacıyeva bədii təfəkkürdə utopiya və distopiya paradiqmalarının strukturlaşdırılmış təhlilindən bəhs edib. Seminar zamanı ingilisdilli bədii ədəbiyyatdan seçilmiş nümunələr əsasında ideal cəmiyyət axtarışlarından başlayan, zaman keçdikcə mütləq hakimiyyət, totalitar nəzarət və fərdi azadlığın məhdudlaşdırılması kimi mövzuları əhatə edən utopiya və distopiya əsərlərinin təhlilinə yer ayrılıb.

Elmi seminarın məqsədi utopiya və distopiya modellərinin bədii mətndəki inkişaf dinamikasını və onların fəlsəfi-ədəbi əsaslarını üzə çıxarmaq idi.

Təhlil prosesində Corc Oruell, Marqaret Etvud, Aldous Haksli və Rey Bredberi kimi müəlliflərin əsərlərindəki güc mexanizmləri, senzura və texnoloji tərəqqinin insan həyatına təsiri kimi fundamental məsələlər müzakirə olunub.

Seminarın sonunda ədəbi mətndəki bu paradiqmaların müasir cəmiyyətin quruluşu və gələcək proqnozları ilə necə səsləşdiyi elmi şəkildə əsaslandırılıb.

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.