18 May - Beynəlxalq Muzeylər Günü münasibətilə Nizami Gəncəvi adına Milli Azərbaycan Ədəbiyyatı Muzeyinin Xaqani Şirvani adına Aran Regional filialında ənənəvi olaraq “Ədəbiyyatımız milli-mənəvi dəyərimizdir” devizi altında növbəti "Açıq qapı" günü keçirilib.

İnsanların asudə vaxtının səmərəli təşkili, onların Azərbaycanın zəngin mədəni irsi ilə yaxından tanış olmalarının təmin edilməsi məqsədilə yəşkil olunan keçirilən “Açıq qapı” günü tədbiri rayon ictimaiyyəti tərəfindən böyük maraqla qarşılanıb. Gün ərzində rayonun idarə və təşkilatlarından, mədəni-maarif müəssisələrindən, təhsil ocaqlarından və ədəbiyyatsevərlərdən ibarət çoxsaylı ziyarətçilər muzeyə baş çəkiblər.

Ziyarətçilər muzeydə nümayiş etdirilən ekspozisiyalarla yaxından tanış olublar. Qqonaqlara muzeyin əməkdaşları tərəfindən klassik və müasir Azərbaycan ədəbiyyatının görkəmli nümayəndələri, onların həyat və yaradıcılığı haqqında dolğun məlumat verilib. Ekskursiyalar zamanı ünvanlanan suallar ətraflı cavablandırılıb, maraqlı müzakirələr aparılıb.

Zziyarətçilərlə aparılan maarifləndirici söhbətlər muzeylərin gənc nəslin milli-mənəvi dəyərlər ruhunda tərbiyə olunmasında, ədəbiyyata marağın artırılmasında mühüm rol oynadığını bir daha nümayiş etdirib.

“Açıq qapı” tədbirində Kürdəmir rayon İcra Hakimiyyətinin başçısı Elşən Həsənli də iştirak edib. O, muzeyi ziyarət edərək ekspozisiyalarla yaxından tanış olub, muzeyin fəaliyyətini, burada Azərbaycan klassik ədəbiyyatı və mədəniyyətinin təbliği məqsədi ilə həyata keçirilən maarifləndirici tədbirləri yüksək qiymətləndirib.

Regionun yetirmələri olan məşhur elm, mədəniyyət və ədəbiyyat xadimlərinin əsərlərindən ibarət olan sərgi ziyarətçilərin diqqətini cəlb edib. Tədbirdə muzeyin nəzdində fəaliyyət göstərən Aran Ədəbi Birliyinin üzvləri də  öz kitablarını təqdim edib, onlar üçün təşkil olunmuş musiqili-ədəbi məclisdə yeni şeirlərini səsləndiriblər.

Tədbirin bədii hissəsi də ziyarətçilər tərəfindən maraqla qarşılanıb. Məktəblilər Nizami Gəncəvinin, Məhəmməd Füzulinin, Xaqani Şirvaninin, İmadəddin Nəsiminin, Mirzə Ələkbər Sabirin, Hüseyn Cavidin, Səməd Vurğunun şeirlərindən nümunələr səsləndirib, ədəbiyyatımıza olan maraq və sevgilərini nümayiş etdiriblər. Onların dahi bəstəkar Üzeyir Hacıbəyovun "O olmasın, bu olsun" əsərindən təqdim etdikləri səhnəcik iştirakçılarda xoş təəssürat yaradıb.

Sonda muzeyi ziyarət edən qonaqlar Beynəlxalq Muzeylər Günü münasibətilə muzey əməkdaşlarını təbrik edib, rəy və təkliflər kitabına ürək sözlərini yazaraq muzeyin fəaliyyətini yüksək qiymətləndirblər.

Qeyd edək ki, muzeyin əməkdaşları gün ərzində muzeyi ziyarət edənlərə Azərbaycanın mədəni irsi, eləcə də klassik ədəbiyyatımız barədə ətraflı məlumat verir, onları müxtəlif mədəniyyət nümunələri, rəsm və heykəltaraşlıq əsərləri ilə yaxından tanış edirlər.

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.