18 Mayda Nizami Gəncəvi adına Milli Azərbaycan Ədəbiyyatı Muzeyində XIII Ümumdünya Şəhərsalma Forumu çərçivəsində maarifləndirici seminar məşğələsi keçirilib.

Muzeyin elmi işlər üzrə direktor müavini, filologiya üzrə fəlsəfə doktoru İlhamə Gültekin “Ağqoyunlular və Səfəvilər dövründə Diyarbəkir surlarının bərpası – kitabə və qabartmalar” mövzusunda məruzə ilə çıxış edib. O, qeyd edib ki, Türkiyənin Diyarbəkir bölgəsinin tarixi məskunlaşma dövrü miladdan öncəki zamana aid edilsə də, şəhərin dəqiq tarixi hələ də müəyyən edilməmişdir.

Daha sonra məruzəçi şəhərin toponimika tarixinə nəzər salaraq müxtəlif əsrlərdə və hakimiyyətlər dövründə şəhərin necə adlandırılması haqqında məlumat vermiş,  1937-ci ildə Mustafa Kamal Atatürkün sərəncamı ilə bölgədəki mis mədənlərinə istinadən şəhərin "Diyarbakır" adını qazanmasını vurğulamışdır.

Bildirilmişdir ki, şəhərin qədim divar və qüllələrində, şurlarında tapılan çoxsalyı  kitabələr Bizans, islam və islamdan öncəki zamana aid olması ilə fərqlənir.

İlhamə xanım qeyd edib ki, XV-XVI əsrlərdə Ağqoyunlu, Səfəvi şahlarının hakimiyyəti altına keçən  Diyarbəkirdə həmin dövrə aid xeyli kitabə də aşkar olunmuşdur.

Dövrünün önəmli tikililəri içərisində “Şeyx Matar məscidi” və “Dörd ayaqlı minarə”ni qeyd edən məruzəçi, minarənin  Hənəfi, Şafi, Maliki və Hənbəli məzhəblərini simvolizə etdiyini vurğulayıb.

Bildirilib ki, Səfəvilər dövrü  memarlığının əsas xüsusiyyətlərini özündə daşıyan  Diyarbəkirin Bismil adlanan rayonu, məhz  Ağqoyunlu və Səfəvi hakimiyyəti dövründə burada məskunlaşan türkman tayfaları tərəfindən salınmışdır.

Seminar məşğələsi muzey əməkdaşlarının sual və çıxışları ilə davam edib.

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.