20 Mayda Nizami Gəncəvi adına Milli Azərbaycan Ədəbiyyatı Muzeyində Dünya Şəhərsalma Forumu çərçivəsində növbəti elmi seminar məşğələsi keçirilib.

Muzeyin “Ekspozisiya” şöbəsinin müdiri, Əməkdar mədəniyyət işçisi Tomiris Babanlı qədim Azərbaycan şəhərlərinin memarlıq, şəhərsalma strukturu, tarixi-mədəni tərəqqi dövrləri haqqında ətraflı məruzə edib.

Bildirilib ki, Nizami muzeyində qorunan eksponatlar maddi sübut olmaqla yanaşı, xalqımızın milli mədəniyyətini nəsildən-nəslə ötürən əsas mənbələrdir. Onların vasitəsilə tarixi köklər üzərində inkişaf edən Azərbaycan şəhərlərinin keçmişdən gələcəyə uzanan inkişaf dinamikasını izləmək mümkündür.

Tomiris xanım qeyd edib ki, XII yüzildə "qızıl əsr"ini yaşayan ədəbiyyatımızın görkəmli nümayəndələri Məhsəti Gəncəvi, Xaqani Şirvani və Nizami Gəncəvi kimi klassik şairlərin əsərlərində dövrün şəhər mühiti, sosial münasibətləri və estetik dünyagörüşü təqdim olunur, şəhərlərin bazar həyatı, saray mədəniyyəti, elm və sənət mühitinin təsvirləri geniş yer tutur.

Daha sonra bildirilib ki, şəhər qalaları, məscidlər, karvansaralar orta əsr şəhər həyatının ayrılmaz hissəsi kimi yalnız funksional deyil, həm də estetik baxımdan zəngin olmuşdur. Məruzəçi qeyd edib ki, Nizami Muzeyinin ekspozisiyası orta əsr Azərbaycan şəhərlərinin mədəniyyətini kompleks şəkildə əks etdirir. Burada ədəbiyyat, incəsənət, sənətkarlıq və memarlıq bir-biri ilə qarşılıqlı əlaqədə təqdim olunur və bütöv bir mədəni sistem kimi dərk edilir.

Təhlil və fikirlərini Tomiris Babanlı seminar məşğələsində nümayiş olunan video çarxla Gəncə, Şamaxı, Təbriz, Ərdəbil şəhərlərinin timsalında təqdim edib.

Seminar məşğələsi filologiya üzrə fəlsəfə doktoru Nəzmiyyə Yigitoğlu, muzeyin Filiallarla iş üzrə direktor müavini Ləman Muxtarova və digərlərinin sual və çıxışları ilə davam edib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.