Avrasiya Universiteti Filologiya fakültəsinin Nizami Gəncəvi adına Milli Azərbaycan Ədəbiyyatı Muzeyində təcrübə keçən tələbələri ilə 26 Mayda növbəti elmi seminar məşğələsi keçirilib.

Seminarda, muzeyin “Virtual təqdimatlar, məktəblərlə və ictimaiyyətlə iş” şöbəsinin elmi işçisi Nazənin Ağayeva “Sosial media və süni intellektin ədəbiyyata təsiri” mövzusunda məruzə edib.

Seminar zamanı sosial medianın müasir ədəbiyyatın yayılmasında rolu, süni intellekt texnologiyalarının yazı prosesinə təsiri, eləcə də rəqəmsal platformaların oxucu və müəllif münasibətlərində yaratdığı yeniliklər barədə ətraflı məlumat verilib. Tələbələrə süni intellekt vasitəsilə hazırlanan ədəbi nümunələr, rəqəmsal məzmunların yaradılması və sosial media platformalarında ədəbiyyatın təbliği ilə bağlı video çarx da təqdim olunub.

Daha sonra müasir dövrdə elektron ədəbiyyatın inkişafı, sosial şəbəkələrin gənc yazarların tanınmasındakı rolu, həmçinin süni intellektin gələcəkdə ədəbi yaradıcılığa mümkün təsirləri kimi məsələlərə toxunulmuşdur.

Seminar məşğələsi tələbələr tərəfindən maraqla qarşılanmış, mövzu ətrafında fikir mübadiləsi aparılaraq suallar səsləndirilmişdir.

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.