Mədəniyyət kanalında “Vətənim” verilişinin Azərbaycan milli mətbuatının böyük nümayəndəsi, görkəmli publisist, tanınmış maarifçi Ömər Faiq Nemanzadəyə həsr olunan növbəti buraxılışı yayımlanıb

Nizami Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynovun təqdimatında efirə gedən verilişdə Ömər Faiq Nemanzadənin ictimai-siyasi baxışları, geniş maarifləndirici və publisistik fəaliyyəti diqqətə çatdırılıb, onun doğma xalqının mədəni dirçəlişi, istiqlalı və xoşbəxt gələcəyi naminə bilik və bacarığını əsirgəmədən əzmlə mübarizə apardığı vurğulanıb. Bildirilib ki, Qafqazın türk əhalisinin maariflənməsi naminə fədakarlıq göstərən, dəfələrlə həbsə məruz qalan və 1937-ci ildə faciəvi aqibətə qovuşan Ömər Faiq Nemanzadə XX əsrin əvvəlində Qafqaz türk xalqlarının milli özünüdərketmə, sosial formalaşma və mədəniyyət proseslərinin hərəkətverici qüvvəsi olub. Görkəmli maarifçi XX əsrdə xalqın milli dirçəlişi, milli şüurun oyanması və formalaşmasında böyük xidmətlər göstərib.

Verilişdə, həmçinin mərhum ədəbiyyatşünas, Nemanzadə irsinin araşdırıcısı, professor Şamil Qurbanovun Ö.F.Nemanzadə irsi ilə bağlı dəyərli tədqiqatlarından bəhs olunub.

Daha sonra tarix üzrə fəlsəfə doktoru, dosent Firdovsiyyə Əhmədova, filologiya üzrə fəlsəfə doktoru Fatma Dursunova, Ö.F.Nemanzadənin qardaşı nəvəsi Çingiz Nemənzadə, Azərbaycan Tibb Universitetinin müəllimi Aida Bəndəliyeva, heykəltaraş Leyla Məmmədova Ömər Faiq Nemanzadənin zəngin elmi irsindən, dövlətçilik xidmətlərindən danışıblar.

“Vətənim” verilişini buradan izləyə bilərsiniz.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.