Nizami Gəncəvi adına Milli Azərbaycan Ədəbiyyatı Muzeyində Uşaqların Beynəlxalq Müdafiəsi Gününə həsr olunmuş “Sülh rəmzi uşaqlar” adlı ədəbi-musiqili tədbir keçirilib.  

Muzeyin Gənc Alimlər Şurasının təşkilatçılığı ilə baş tutan mərasimdə Bakı məktəbliləri ilə yanaşı, ölkəmizdə təhsil alan əcnəbi şagirdlər, eləcə də respublika xüsusi internat məktəbinin fiziki imkanları məhdud uşaqları iştirak ediblər.

Ədəbi-musiqili tədbiri giriş nitqi ilə muzeyin direktoru, akademik Rafael Hüseynov açaraq uşaqları əlamətdar gün münasibətilə təbrik edib, onlara sağlam həyat, xoş, firavan günlər arzulayıb. 

Uşaqların Beynəlxalq Müdafiəsi Gününün tarixi əhəmiyyətindən danışan direktor uşaqların hüquqlarının qorunmasının cəmiyyətin əsas vəzifələrindən biri olduğunu vurğulayıb. Alim uşaqlara qayğının, diqqətin, onlara parlaq gələcək bəxş edilməsinin ilk şərtinin yüksək təhsil və elmlərə yiyələnmək olduğunu bildirib.

Akademik Rafael Hüseynov istedadlı uşaqların inkişafına dəstək verilməsinin zəruriliyini qeyd edərək, ölkəmizdə uşaqlar üçün yaradılan şəraitdən, onların azad və təhlükəsiz yaşamaları, təhsil almaları, inkişaf etmələri və mütəxəssis kimi formalaşmaları istiqamətində həyata keçirilən dövlət layihələrindən danışıb. Vurğulayıb ki, uşaqlar cəmiyyətin gələcəyi hesab olunurlar və onların sağlam, təhlükəsiz və xoşbəxt böyümələri üçün müxtəlif qanunlar, proqramlar və sosial layihələr həyata keçirilir.

O, dahi müttəfəkkir Nizami Gəncəvinin "Qüvvət elmdədir, başqa cür heç kəs, Heç kəsə üstünlük eyləyə bilməz" sözlərini sitat gətirərək, uşaqlara təhsilli, bilikli, savadlı olmağı tövsiyə edib.

Daha sonra tədbirin aparıcısı, muzeyin Gənc Alimlər Şurasının sədri Nuran Bağırova gənc istedadları səhnəyə dəvət edib.

İnklüziv, ədəbi-musiqili tədbirdə şagirdlər tərəfindən vokal və müxtəlif musiqi alətlərində ifalar, Azərbaycan Ukrayna, Çin, italyan, rus, urdu, türk dillərində dünya ədəbiyyatından seçmələrin qiraətləri, eləcə də rəsm əsərlərinin sərgisi və digər yaradıcılıq nümunələri təqdim olunub.  

Tədbirdə əsasən “dünyaya sülh, barış” çağırışlı şeir nümunələri səsləndirilib, vətənpərvərlik mövzusunda mahnılar ifa edilib.

“Sülh rəmzi uşaqlar”ın incəsənət üzrə gənc istedadları kimi Tofiq Quliyev adına 12 nömrəli məktəbin, Avropa-Azərbaycan məktəbinin, Bakı Türk İlkokulunun, 3 saylı Uşaq-Gənclər İnkişaf Mərkəzinin və 3 saylı Respublika xüsusi internat məktəbinin şagirdləri fərqləniblər.  Onlar Ədəbiyyat Muzeyinin rəhbərliyi tərəfindən Fəxri fərmanlarla təltif olunublar.

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.