Mədəniyyət kanalında “Vətənim” verilişinin görkəmli dramaturq Cəfər Cabbarlıya həsr olunan altıncı buraxılışı yayımlanıb.

Nizami Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynovun təqdimatında efirə gedən verilişdə Cəfər Cabbarlının ömrünün son günlərində qələmə aldığı "Bakı" hekayəsindən, onun yaxın dostluq etdiyi İsmayıl Hidayətzadə ilə münasibətlərindən, həyatdan köçmüş qardaşlarından, tərcüməçilik fəaliyyətindən bəhs edilib.

Akademik Rafael Hüseynov görkəmli dramaturqun ömür yoluna nəzər salaraq bildirib ki, Cəfər Cabbarlıda görücülük də vardı, öncədən gördüyü gələcəyi necə qurmağa bəri başdan tədarüklər etmək istedadı da. Cəfər Cabbarlı dünyaya vəzifə ilə gəldiyini dərketmişlərdəndi. Ona yazılan ömür möhləti içərisində nə etməli idisə, son saatınacan həmin tapşırıqları mütləq yerinə yetirməli idi. O, səhnəyə, ədəbiyyata, mədəniyyətə, bu xalqın parlaq görməyi umduqları gələcəyinə nələri varsa fəda etməyə hazır insan idi.

Verilişdə, həmçinin Cəfər Cabbarlının cəmiyyət və ailə münasibətləri fonunda baş verən faciəni əks etdirən “Aydın” pyesindən, həmin əsərin əbədi məhkəməsindən danışılıb.

Qeyd olunub ki, görkəmli dramaturq 1932-ci ildə qələmə aldığı "Dönüş" əsərini yaradıcılığının ən yaxşı əsəri hesab edib.

“Vətənim” verilişini buradan izləyə bilərsiniz.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.