08 iyun 2026-cı il tarixində Xəzər Universitetində AMEA Məhəmməd Füzuli adına Əlyazmalar İnstitutunun və Xəzər Universitetinin birgə təşkilatçılığı ilə Xaqani Şirvaninin 900 illiyinə həsr olunmuş “Sələflər və xələflər: Orta əsr əlyazmaları və Azərbaycan mədəniyyətinin tarixi problemləri” mövzusunda  respublika elmi konfransı təşkil olunmuşdur.

Tədbiri giriş sözü ilə Xəzər Universiteti adından filologiya üzrə fəlsəfə doktoru Fəridə Seyidova açaraq elmi konfransın Azərbaycan Respublikası Prezidentinin böyük Azərbaycan şairi Xaqani Şirvaninin 900 illik yubileyinin qeyd olunması ilə bağlı 28 yanvar 2026-cı il tarixli Sərəncamına əsasən keçirildiyini bildirib.

Açılış mərasimində AMEA Nizami Gəncəvi adına Ədəbiyyat İnstitutunun “Qədim dövr Azərbaycan ədəbiyyat” şöbəsinin müdiri, fil.e.d., prof. İmamverdi Həmidov, həmin şöbənin aparıcı elmi işçisi, fil.ü.f.d. Elnarə Zeynalova, AMEA Məhəmməd Füzuli adına Əlyazmalar İnstitutunun elmi katibi, tar.ü.f.d., dos. Aynur Hacıqədirli çıxış ediblər.

Nizami Gəncəvi adına Milli Azərbaycan Ədəbiyyatı muzeyinin “Rəqəmsallaşdırma, əlyazmaların tədqiqi və nəşr resursları” şöbəsinin müdiri, fil.ü.f.d. Gülnar Əqiq və muzeyin “Elmi fondlar” şöbəsinin müdiri, fil.ü.f.d. Nərmin Əliyeva elmi konfransda iştirak ediblər.

Nərmin Əliyeva konfransın II panel iclasında “Xaqani Şirvani və Məhəmmədhüseyn Şəhriyar yaradıcılığında tarixi-fəlsəfi düşüncənin müqayisəli təhlili” adlı məruzə ilə çıxış edərək, hər iki söz ustadının yaradıcılığında tarixi hadisələrin bədii-fəlsəfi konteksdə təsvir olunduğunu qeyd edib. O, bildirib ki, Xaqani  Yaxın və Orta Şərq xalqlarının ədəbi-fəlsəfi fikrinin inkişafına güclü təsir göstərmiş, ustad Şəhriyar onun poeziya ənənələrindən yüksək sənətkarlıqla bəhrələnmiş, əsərlərində böyük şairi ehtiramla yad etmişdir.

Gülnar Əqiq konfransın IV panel iclasında “Xaqani Şirvani irsinin Yaxın və Orta Şərq ədəbiyyatına təsiri” mövzusunda məruzə edib. O, Azərbaycanın dünya mədəniyyətinə bəxş etdiyi görkəmli söz ustalarından biri olan Xaqani Şirvaninin zəngin bədii irsi ilə Yaxın və Orta Şərq xalqlarının ədəbi-mədəni həyatında mühüm mövqe tutduğunu, şairin yaradıcılığının klassik Şərq poeziyasının inkişafına əhəmiyyətli təsir göstərdiyini, əsərlərinin poetik üslubunun orijinallığı, dilinin zənginliyi və fəlsəfi dərinliyi ilə seçilərək sonrakı dövrlərin ədəbi düşüncəsinin formalaşmasında mühüm rol oynadığını qeyd edib.

Bölmə iclasları çıxışlardan sonra müzakirə və suallarla davam etdirilib. Sonda konfrans iştirakçılarına sertifikatlar təqdim edilib.

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.