Mədəniyyət Nazirliyinin Mədəniyyət üzrə Elmi-Metodiki və İxtisasartırma Mərkəzi Prezident İlham Əliyevin 14 yanvar 2026-cı il tarixli Sərəncamı ilə təsdiq edilmiş “Azərbaycan Mədəniyyəti – 2040” Azərbaycan Respublikasının Mədəniyyət Konsepsiyası”nın qarşıya qoyduğu məqsəd və hədəflərin işığında "Dilimiz milli-mədəni kimliyimizin təməlidir" mövzusunda silsilə seminarlardan ibarət yeni layihəyə start verib.

M.F.Axundov adına Azərbaycan Milli Kitabxanasında təşkil olunan ilk seminarda Milli Məclisin sədr müavini, Nizami Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynovun mövzu üzrə geniş məruzə ilə çıxış edib.

Əvvəlcə Azərbaycan Milli Kitabxanasının direktoru, professor Kərim Tahirov çıxış edərək bildirib ki, dövlət başçısının müvafiq Sərəncamı ilə təsdiq edilmiş “Azərbaycan Mədəniyyəti – 2040” Azərbaycan Respublikasının Mədəniyyət Konsepsiyası ölkəmizin mədəni siyasətinin gələcək onilliklər üzrə strateji istiqamətlərini müəyyənləşdirən mühüm sənəddir. Konsepsiya yalnız bu günü deyil, gələcək nəsillərin mədəni düşüncə və estetik zövqünün formalaşmasını da hədəfləyən uzaqgörən bir baxışın ifadəsidir.

Professor Kərim Tahirov qeyd edib ki, “Azərbaycan Mədəniyyəti – 2040” Konsepsiyası mədəniyyətə sistemli yanaşma sərgiləyir və Azərbaycan mədəniyyətinin əsas sahələrini - Azərbaycan dili, davranış mədəniyyəti, bilgi mədəniyyəti, ədəbiyyat, incəsənət və mədəni irsi əhatə edir. Konsepsiyada Azərbaycan dili və ədəbiyyatı ilk dəfə olaraq mədəniyyətin aparıcı vəzifələrindən biri kimi müəyyənləşib.

"Azərbaycan Mədəniyyəti – 2040" Mədəniyyət Konsepsiyasında nəzərdə tutulmuş hədəflərə nail olunması və Konsepsiya üzrə tapşırıqların icrasının təmin edilməsi məqsədilə Mədəniyyət Nazirliyi tərəfindən mədəniyyət sahəsində idarəetmənin təkmilləşdirilməsinin həyata keçirildiyini söyləyən professor Kərim Tahirov nazirlikdə Azərbaycan dili və ədəbiyyat siyasəti adlı ayrıca şöbənin yaradıldığını da diqqətə çatdırıb.

Daha sonra akademik Rafael Hüseynov "Dilimiz milli-mədəni kimliyimizin təməlidir" mövzusunda məruzə ilə çıxış edərək Azərbaycanın müstəqillik tarixindən və inkişaf yolundan danışıb.

O, Azərbaycanın üçrəngli bayrağının başımız üzərində ucalması, istiqlal içərisində olmağımız yolunda xalqımızın apardığı mübarizələrdən bəhs edərək respublikamızın öz istiqlal yolunu və xəttini seçməsində Ulu Öndər Heydər Əliyevin misilsiz xidmətlərini xüsusi qeyd edib. Vurğulayıb ki, Prezident İlham Əliyevin siyasi iradəsi ilə Vətən müharibəsində qazandığımız tarixi Zəfər Azərbaycanı daha da möhkəmləndirib, dövlətimizin regionda və dünyada nüfuzu daha da güclənib.

“Azərbaycan Mədəniyyəti – 2040” Konsepsiyasının müstəqilliyimizin və suverenliyimizin tam bərpa olunduğu bir zamanda qəbul edilməsinin təsadüfi olmadığını söyləyən alim bildirib ki, Konsepsiya qlobal və daxili çağırışlar nəzərə alınmaqla Azərbaycanın milli kimliyinə əsaslanan müasir mədəniyyət modelinin formalaşdırılması, inkişaf etdirilməsi və 2040-cı ilədək digər mədəniyyətlərlə qarşılıqlı əlaqələrin genişləndirilməsi məqsədi daşıyan strateji planlaşdırma sənədidir. 

Onun sözlərinə görə, Azərbaycan mədəniyyətinin müasir modeli qlobal çağırışlara cavab verməklə yanaşı, milli-mənəvi dəyərlərin qorunub saxlanılmasını təmin edən mədəniyyət modelidir. Bu məqsədlə Konsepsiya milli mədəniyyətə yeni strateji baxışı şərtləndirir. Konsepsiyanın uğurla həyata keçirilməsi və müasir mədəniyyət modelinin işlək olması üçün normativ hüquqi bazanın təkmilləşdirilməsi, idarəetmə formasının, müasir sosial-iqtisadi yanaşmanın təmin edilməsi zəruridir.

Alim müasir çağırışlara cavab verəcək “Azərbaycan Mədəniyyəti – 2040” Konsepsiyasının üç mərhələdə - 2026-2030, 2031-2035, 2036-2040-cı illərdə bütün istiqamətlər üzrə həyata keçiriləcəyini söyləyib. O, Konsepsiyada Azərbaycan dilinin və ədəbiyyatının inkişafı, beynəlxalq aləmdə təbliği və təşviqi ilə bağlı əlaqələndirilmiş fəaliyyətin aparılması kimi mühüm məsələlərin əks olunduğunu vurğulayıb.

Akademik Rafael Hüseynov qeyd edib ki, Azərbaycan dilinin zənginliyi, tarixi kökləri və ifadə imkanları haqqında danışan Prezident İlham Əliyev çıxışlarında dəfələrlə vurğulayıb ki, ana dilimiz sadəcə ünsiyyət vasitəsi deyil, milli kimliyimizin və dövlət müstəqilliyimizin mənəvi dayağıdır. Dövlət başçısının dilimizlə bağlı çağırışları, həm tarixi köklərimizə sədaqətin, həm də milli birliyin möhkəmləndirilməsinin bariz nümunəsidir. Onun sözlərinə görə, ölkə başçısının Azərbaycan dili ilə bağlı qarşıya qoyduğu tələblərə uyğun olaraq internet mühitində digər dillərin Azərbaycan dilini sıxışdırmaması, dilimizin saflığının, təhlükəsizliyinin qorunması və ona olan müxtəlif növ təhdidlərin qarşısının alınması üçün müvafiq tədbirlərin görülməsi vacibdir.

"Azərbaycan dilinin tədrisi, qramatikası ilə bağlı bir sıra işlər görülməlidir. Dilimizin saflığının qorunması, ədəbi dil normalarının pozulması hallarının qarşısının alınması sahəsində tədbirlər gücləndirilməlidir", - deyən kademik Rafael Hüseynov ölkəmizdə  dil pozuntularına nəzarət məsələlərinə yanaşma ilə əlaqdar qurumun yaradılmasına ehtiyac olduğunu bildirib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.