Mülki Müdafiə üzrə 2025-ci il üçün təsdiq edilmiş Tədbirlər Planına uyğun olaraq, 18 iyun 2025-ci il tarixində Nizami Gəncəvi adına Milli Azərbaycan Ədəbiyyatı Muzeyində "Fövqəladə hadisələrin nəticələrinin aradan qaldırılması zamanı mülki müdafiə orqan və qüvvələrinin idarə edilməsinin təşkili" mövzusunda rəhbər heyətin mülki müdafiə məşqi keçirilmişdir.

Məşqin əsas məqsədi fövqəladə hallar zamanı rəhbər heyətin idarəetmə bacarıqlarının təkmilləşdirilməsi, mülki müdafiə orqan və qüvvələrinin qarşılıqlı fəaliyyətinin gücləndirilməsi, fövqəladə vəziyyətlərdə operativ qərar qəbuletmə mexanizmlərinin təkmilləşdirilməsi, həmçinin şəxsi heyətin nəzəri bilik və praktiki hazırlıq səviyyəsinin artırılması olmuşdur.

Məşqə hazırlıq mərhələsində muzey rəhbərinin müvafiq əmri ilə tədbirin təşkili və keçirilməsi planı hazırlanmış, məşqin proqramı və ssenarisi təsdiq edilmişdir. Hazırlıq çərçivəsində rəhbər heyət, mülki müdafiə qüvvələrinin komandir-rəis heyəti və Fövqəladə Hallar Komissiyasının üzvlərinin iştirakı ilə metodiki toplantı keçirilmiş, məşqin məqsədi, vəzifələri, icra olunacaq tədbirlər, iştirakçıların funksional öhdəlikləri və fəaliyyət ardıcıllığı ətraflı izah edilmişdir. Toplantıda fövqəladə hallara hazırlığın əhəmiyyəti xüsusi vurğulanmış, mülki müdafiə sahəsində normativ sənədlərin tələbləri bir daha iştirakçıların diqqətinə çatdırılmışdır.

Məşq 18 iyun 2025-ci il tarixində saat 11:00-da muzeyin Cümhuriyyət zalında keçirilmişdir. Tədbirdə muzeyin rəhbər heyəti, mülki müdafiə qüvvələrinin komandir-rəis heyəti iştirak etmişlər.

Tədbiri giriş sözü ilə Muzeyin Mülki Müdafiə Qərargahının rəisi İsmayıl Muxtarov açaraq iştirakçıları salamlamış, rəhbər heyətin mülki müdafiə məşqinin keçirilməsinin məqsədi, qarşıya qoyulan əsas vəzifələr və bu cür tədbirlərin fövqəladə hallara hazırlıq baxımından əhəmiyyəti barədə geniş məlumat vermişdir. O bildirmişdir ki, mülki müdafiə tədbirlərinin vaxtında və düzgün həyata keçirilməsi insanların həyat və sağlamlığının qorunmasında, maddi-mədəni sərvətlərin mühafizəsində və fövqəladə hadisələrin nəticələrinin minimuma endirilməsində mühüm rol oynayır.

Daha sonra muzeyin yanğından mühafizə mühəndisi, eyni zamanda yanğınsöndürmə manqasının komandiri Pərviz Ələsgərov çıxış edərək fövqəladə hallar zamanı əhalinin və əməkdaşların təhlükəsizliyinin təmin olunması istiqamətində həyata keçirilməli olan əsas tədbirlər barədə ətraflı məlumat vermişdir. Çıxış zamanı yanğın, zəlzələ, texnogen qəzalar və digər fövqəladə hallar zamanı düzgün davranış qaydaları, insanların təhlükəsiz təxliyəsinin təşkili, ilkin yanğınsöndürmə vasitələrindən istifadə, xəbərdarlıq siqnalları zamanı görüləcək tədbirlər və panikanın qarşısının alınması yolları izah edilmişdir.

Tədbir çərçivəsində fövqəladə hallar zamanı rəhbər heyətin operativ idarəetmə fəaliyyəti, qərarların vaxtında qəbul edilməsinin əhəmiyyəti, mülki müdafiə qüvvələrinin qarşılıqlı əlaqələndirilmiş fəaliyyəti və fövqəladə vəziyyətlərdə koordinasiyanın təmin olunması məsələləri də müzakirə edilmişdir. İştirakçılar mövzu üzrə fikir mübadiləsi aparmış, real şəraitdə yarana biləcək risklər və onların aradan qaldırılması yolları ətrafında müzakirələr keçirilmişdir.

Məşqin yekununda iştirakçılar tərəfindən verilən suallar ətraflı cavablandırılmış, fövqəladə hallar zamanı yadda saxlanılması vacib olan əsas təhlükəsizlik qaydaları bir daha diqqətə çatdırılmışdır. Tədbirin sonunda mövzu ilə bağlı maarifləndirici videoçarx nümayiş etdirilmiş, iştirakçılara mülki müdafiə sahəsində bilik və hazırlığın daim təkmilləşdirilməsinin vacibliyi vurğulanmışdır.

Keçirilmiş rəhbər heyətin mülki müdafiə məşqi qarşıya qoyulmuş məqsədlərə uyğun şəkildə təşkil olunmuş, iştirakçılar tərəfindən fəal maraqla qarşılanmış və fövqəladə hallar zamanı idarəetmə, qarşılıqlı fəaliyyət və operativ qərar qəbuletmə bacarıqlarının möhkəmləndirilməsi baxımından səmərəli nəticələr vermişdir.