100 yaşını arxada qoymuş, artıq şərəfli ömrünün ikinci yüzilini yaşayan Bakı Dövlət Universitetinin Şərqşünaslıq fakultəsi yetişdirdiyi məzunları ilə Azərbaycanın ictimai-siyasi, elmi-mədəni-ədəbi gerçəkliyinə böyük töhfələr vermiş, şanlı bir tarix yazmışdır.

Bakı Dövlət Universitetinin şərqşünas yetirmələri adları Azərbaycan tarixində həmişə qalacaq bir silsilə qiymətli mütəxəssislər ordusudur və həmin xətt bu gün də davam etməkdədir.

Bakı Dövlət Universitetinin şərqşünaslıq fakultəsi var olduğu müddətcə həm də daim Azərbaycanda şərqşünaslıq elminin mərkəzi sayılmış, bütün dövrlərdə həmin birinciliyini qoruyub saxlamışdır.

İlk sayı 1926-cı ildə işıq üzü görmüş Şərşünaslıq jurnalı isə hər zaman bu elm sahəsinin ən mühüm elmi nailiyyətlərini əks etdirən bir vacib laboratoriya vəzifəsini yerinə yetirmişdir.

Şərqşünaslıq jurnalının ilk redaktorları görkəmli alimlər, professorlar B.Çobanzadə və A.Baqriya olmuşdular. Lakin sonra jurnal fəaliyyətini uzun zaman üçün dayandırmışdı.

1970-ci illərdə Şərqşünaslıq jurnalı fəaliyyətini bərpa etdi və o dövrdə burada məqalələri dərc edilənlərin hamısı əsasən fakultənin müəllimləri idilər və illər sonra onların neçəsi Azərbaycanın aparıcı şərqşünas alimləri kimi şöhrətləndilər.

Həmin dövrdə jurnalın redaktorları fakultə dekanı vəzifəsini daşıyan tanınmış alimlər Həsən Mahmudov və Şulan Şirəliyev oldular.

Elə onların da doktorluq dissertasiyaları fakultənin digər müəllimləri Yusif Şirvan, Təhminə Rüstəmova, Vasim Məmmədəliyev, Xeyri əl-Abbasi və digərlərininki kimi ayrı-ayrı məqalələr şəkilində ilk dəfə məhz Şərqşünaslıq jurnalında işıq üzü görərək elmi ictamiyyətə çatdı.

Lakin yenə təəsdsüflər olsun ki, Şərqşünaslıq jurnalı nəşrini dayandırdı və budəfəki susmaqlıq da xeyli uzun çəkdi.

Şərqşünaslıq fakultəsinin həyatına, bütövlükdə Azərbaycanda şərqşünaslıq elminin inkişafına yeni impuls vermək arzusu ilə yaşayan BDU rektoru Elçin Babayev universitetin nəşrlərini müasir elmi səviyyəyə qaldırmaq yolunda gerçəkləşdirdiyi tədbirlər sırasında Şərqşünaslıq jurnalının da bərpasını, ona yeni nəfəs verilməsini zəruri saydı.

Bu iş mənə həvalə edildi və 2021-ci ildə sanballı bir redaksiya heyəti də yaradaraq BDU Şərqşünaslıq jurnalının nəşrinə başladıq.

1975-ci ildə mən Universitetin yeganə tələbəsi oldum ki, o vaxt adətən yalnız elmi dərəcəsi olan ailmlərin, yaxud dissertasiya müdafiəsinə hazırlaşan fakultə müəllimlərinin əsərləri dərc edilən Şərqşünaslıq jurnalında professor Rəhim Sultanovun təqdimatı ilə elmi məqaləm dərc olundu.

Fəxr edirəm ki, üstündən yarım əsrə yaxın vaxt ötərkən o jurnalı yenidən dirçəltmək yolunda çalışanlardan biri olmaq qismətimə düşdü.

Artıq 6-cı ildir ki, BDU-nun Şərqşünaslıq jurnalı yüksək səviyyədə nəşr edilir.

Bu ildən biz jurnalın nəşr ardıcıllığını ildə 4 nömrəyə çatdırmışıq.

Qovluğumuzda bizim jurnalda dərc edilmək üçün məqalələrini göndərmiş xeyli məşhur əcnəbi şərqşünas alimin əsərləri nəşr növbəsini gözləyir.

Hədəfimiz Şərqşünaslıq jurnaslını dünyanın yüksək rerytinqli mötəbər elmi nəşrləri səviyyəsinə qaldırmaqdır.

Bu il Şərqşünaslıq jurnalı üçün yubiley ilidir – 100 yaşı tamam olacaq.

Artıq builki 2 sayımız işıq üzü görüb.

İlin sonunadək biri tam ingilisdilli məqalələrdən ibarət olmaqla daha 2 nömrəmizi burxacağıq.

Ancaq payızda, yeni dərs ilinin başlanğıcında həm də müxtəlif nəsillərin tanınmış şərqşünas alimlərinin iştirakı ilə BDU Şərqşünaslıq jurnalının bir əsrlik yubileyini də qeyd edəcəyik.

“Şərqşünas” jurnalının məzmunca necəliyini əyani görməniz üçün onu hər halda özünüzün vərəqləməyiniz məsləhətdir.

Gözəl ənənələri olmuş bir dəyərli elm nəşr - Şərşünaslıq jurnalı bərpa edilərək daha yüksək səviyyədə yolunu davam etdirməyə başladısa və bu yolla inamla, getdikcə daha çox güc yığaraq irəliləyirsə, əlbəttə, bilavasitə bu işi yerinə yetirənlərin hər birinin əməyi minnətdarlıqla xatırlanmalıdır.

Ancaq təşəkkürlərin ən böyüyü bu dərgiyə yeni qanad və həyat vermiş BDU rektoru Elçin Babayevin halal haqqıdır.

O olmasaydı, artıq 6 ildir ki, ardıcıl nəşr edilən və ümid edirəm, daha heç vaxt dayanmayacaq bugünkü BDU ŞƏRŞÜNASLIQ jurnalı da olmazdı!

 

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.