Almaniyada yaşayan soydaşmız Əziz Səlami Azərbaycana səfəri çərçivəsində Nizami Gəncəvi adına Milli Azərbaycan Ədəbiyyatı Muzeyinin qonağı olub.

Əslən Güney Azərbaycandan olan şair və tərçüməçi Əziz Səlami Azərbaycan dilində bir çox şeir və tərcümə kitablarının müəllifidir. Onun indiyədək 20-dən artıq kitabı, o cümlədən “Bahara yazdıqlarım”, “Qanadlılar”, “Anamın yurdu uzaqlardan”, “Susmaz mahnı”, “Yollar boyu dostumuz”, “Altunun son anları”, “Bir işıq yanır içimizdə”, “Təbrizdən Bakıya uçan durnalar”, “Aç qollarını ana yurdum”, “Solmayan ulduzlar” və s.  adlı şeir kitabları Almaniyada  nəşr olunub.  

Əziz Səlami uzun illərdir ki, Almaniyada yaradıcılıq fəaliyyəti ilə məşğul olur, eyni zamanda vətəndən uzaqlarda ana dilinin qorunması və təbliği istiqamətində əzmkarlıqla çalışır. Onun ədəbi fəaliyyətində tərcüməçilik xüsusi yer tutur. Belə ki, Əziz Səlaminin tərcüməsində “Alman şeiri antologiyası” 2020-ci ildə Berlində nəşr olunub. Antologiyaya səkkiz yüz ili əhatə edən alman poeziyasından nümunələr daxil edilib. Əziz Səlami tərəfindən şeirləri Azərbaycan dilinə tərcümə edilmiş müəlliflər arasında Volfram fon Eşenbax, Hans Zaks,  Paul Fleminq, Anna Luiza Karş, İohan Volfqanq Qöte, Fridrix Şiller, Heynrix Heyne, Fridrix Nitse kimi  görkəmli şairlər də var. Qeyd etmək lazımdır ki, burada yer alan bir çox alman şairlərinin əsərləri ilk dəfə Azərbaycan dilinə tərcümə edilib.

Şair Əziz Səlami Nizami Muzeyini ziyarət edərək Azərbaycan ədəbiyyatının tarixi inkişaf yolu ilə yaxından tanış olub. Qonağa muzeyin “Rəqəmsallaşdırma, əlyazmaların tədqiqi və nəşr resursları” şöbəsinin müdiri, fil.ü.f.d. Gülnar Əqiq bələdçilik edib.

Əziz Səlami muzeyi gəzərək Azərbaycan ədəbiyyatından bəhs edən  zəngin ekspozisiyaya maraqla tamaşa edib. Onun diqqətini, xüsusilə muzeyin Cənubi Azərbaycan ədəbiyyatına həsr olunmuş ekspozisiya salonu cəlb edib. Qonaq burada Ustad Məhəmmədhüseyn Şəhriyar, Bulud Səhənd, Həbib Sahir, Söhrab Tahir, Balaş Azəroğlu, Mədinə Gülgün kimi Güney Azərbaycan şairlərinə həsr olunmuş guşələrlə tanış olub, cənublu soydaşlarımızın bədii irsinin  bu mədəniyyət ocağında yaşadılmasını böyük rəğbət hissi ilə qarşılayıb.

Qonağa muzeyin direktoru, akademik Rafael Hüseynovun müəllifi olduğu XII yüzilliyin Azərbaycan şairi Məhsəti Gəncəvinin 900 illiyi münasibətilə nəşr olunmuş “Məhsəti Gəncəvi (portret-oçerk)" kitabı hədiyyə edilib.

Sonra Əziz Səlami muzeyin “Rəy kitabı”nda muzeylə bağlı xoş təəssüratlarını bölüşərək -  “Azərbaycanımızın zəngin və dəyərli muzeyini böyük  sevinc və qürur duyğuları ilə ziyarət etdim" sözlərini yazıb.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.