Bu gün Azərbaycan Respublikası Mədəniyyət Nazirliyinin və Özbəkistan Respublikasındakı Heydər Əliyev adına Azərbaycan Mədəniyyət Mərkəzinin təşəbbüsü ilə “Azərbaycan mədəniyyətinin yay məktəbi” layihəsi çərçivəsində reallaşan tədbirin gənc iştirakçıları Nizami Gəncəvi adına Milli Azərbaycan Ədəbiyyatı Muzeyinin qonağı oldular.

Azərbaycan və Özbəkistan gəncləri arasında mədəni, humanitar və dostluq əlaqələrinin daha da möhkəmləndirilməsinə xidmət edən bu layihə qonaqlara xalqımızın zəngin mədəni və ədəbi irsi ilə tanış olmağa geniş imkan yaratmışdır. Özbək gənclərinin “Xarıbülbül” səhnə və musiqi truppasının üzvləri Muzeyin zəngin ekspozisiyasını gəzərək, minillik Azərbaycan ədəbiyyatı tarixinə səyahət etdilər, xalqımızın görkəmli yazıçı və şairləri haqqında maraqlı məlumat dinlədilər. Muzeyin zallarında nümayiş olunan, tariximizin şanlı səhifələrini özündə əks etdirən müxtəlif rəsm əsərləri, şair və yazıçılarımızın portretləri, onların əsərləri mövzusunda yaradılmış tablolar, rəngarəng illüstrasiyalar, zərif ilməli süjetli xalçalar, heykəltaraşlıq nümunələri gənclərin Azərbyacanın ədəbiyyatı ilə əyani şəkildə tanış olması üçün maraqlı vasitə oldu.

Ekspozisiya şöbəsinin müdiri Tomiris Babanlı gənclərə türkdilli xalqlar ədəbiyyatında ana dilində ilk “Xəmsə”nin müəllifi” Əlişir Nəvai haqqında məlumat verərkən onlar həm təəccüb, həm də sevinc hisslərini gizlətmədilər. Nizami Gəncəvinin davamçılarından olan məşhur özbək şairi və filosofu Əlişir Nəvainin Nizamidən ilhamlanaraq yazdığı beş məsnəvidən ibarət olan “Xəmsə”si,  “Fərhad və Şirin”, “Leyli və Məcnun” kimi mənzum romanları, Makedoniyalı İskəndərin həyatından bəhs edən “Səddi-İskəndəri”, sasani hökmdarı Bəhram Gurun həyatından bəhs edən “Səbəy-Səyyarə”adlı tarixi əsərləri barədə məlumatı dinlədikcə qonaqlarımız məmnunluqla xalqlarımızın bir-birinə ruhən nə qədər yaxın olduğunu hiss edirdilər. Onlara rəssam Elçin Aslanovun “Nəvainin yuxusu” əsasında çəkilmiş “Şərq ulduzları” adlı tablonu göstərərkən Nizami Gəncəvinin Nəvaini məclisə dəvət etməsi və ona üz tutaraq: "Sən qəzəl mülkünə hakim oldun. Sənin qüdrətli çeşmən mənim “Xəmsə”mdir" – deyərək onun yaradıcılığını yüksək qiymətləndirməsi gəncləri daha çox  heyrətləndirdi.

Ekskursiya zamanı gənc aktyorlar həmçinin Azərbaycanın qədim teatr ənənələri, Azərbaycan professional teatrının təşəkkülündə xalq teatrının  əhəmiyyətli rolunun olması haqqında məlumat aldılar. Daha sonra gənc aktyorlara M.F.Axundovun Şərqdə ilk dram əsərləri yazmasından və dramaturqun 1873-cü ildə Bakıda səhnəyə qoyulan “Lənkəran xanın vəziri” və “Hacı Qara” tamaşalarından, Şərqdə ilk opera olan Ü.Hacıbəyovun “Leyli və Məcnun”undan, 1896-cı ildə H.Zərdabinin Bakıda “Birinci müsəlman dram truppası” adlı ilk professional teatr kollektivini təşkil etməsindən, 1897-ci ildə Bakıda ilk dəfə “Artistlər ittifaqı”nın  yaradılmasından, C.Cabbarlının Azərbaycan səhnəsində indi də müvəffəqiyyətlə oynanılan dram əsərlərindən söhbət açıldı. Gənclər Azərbaycana olan böyük sevgiləri nəticəsində özlərinin “Xarıbülbül” truppası ilə Ü.Hacıbəyovun “Arşın mal alan”, S. Rəhmanın “Hicran” tamaşalarını səhnələşdirmələrindən danışdılar.

 Maraqlı və səmimi səyahətin sonunda Nizami Gəncəvi adına Muzeyin direktoru, akademik, Millət vəkili Rafael Hüseynov Özbəkistandakı Heydər Əliyev adına Azərbaycan Mədəniyyət Mərkəzinin rəhbəri Akif Marifli ilə görüşdü, gənclərə “İstiqlal” zalında Muzeyin nəşrlərindən olan “Şirvan şairləri” kitabını hədiyyə etdi. Rafael Hüseynov müəllifi olduğu bu kitabda qədim Azərbaycan torpağı olan Şirvan bölgəsinin zəngin ədəbi ənənələrə malik olmasından, Şirvanda doğulmuş görkəmli şair, alim, filosoflar Xaqani Şirvani, Seyid İmadəddin Nəsimi, Bədr Şirvani, Seyid Əzim Şirvani, Mirzə Ələkbər Sabir və başqaları haqqında məlumat verildiyindən bəhs etdi , onları Şərq poeziyasının zirvələri adlandırdı. Muzeyin qonaqları ilə xatirə şəkilləri çəkdirən Rafael Hüseynov gənclərə öz tövsiyələrini verdi, onlara işlərində və təhsildə uğurlar arzuladı. Qonaqlar Muzeyin “Rəy kitabı”na ürək sözlərini yazaraq, tarixi, dini, elmi, mədəni əlaqələr baxımından bir-birinə yaxın olan xalqlarımızın bundan sonra da əlaqələrinin dostluq və qardaşlıq zəminində inkişaf edəcəyinə inandıqlarını bildirdilər.

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.