Nizami Gəncəvi adına Milli Azərbaycan Ədəbiyyatı Muzeyi Özbəkistandan gəlmiş alimləri qəbul edib.

AMEA Məhəmməd Füzuli adına Əlyazmalar İnstitutunun fəxri qonaqları - Özbəkistan Respublikası Elmlər Akademiyasının Əbu Reyhan Biruni adına Şərqşünaslıq İnstitutunun elmi işlər üzrə direktor müavini, tarix elmləri doktoru, professor Sürəyya Kərimova və həmin institutun Klassik ədəbiyyat şöbəsinin müdiri, filologiya elmləri namizədi, dosent Səlimxon Eşonova Muzeyin ekspozisiyası ilə tanış olublar. Qonaqları Əlyazmalar İnstitutunun əməkdaşı filologiya üzrə fəlsəfə doktoru, dosent Xatirə Yusifova müşayiət edib.

Muzeyin elmi işçisi Zarema İbrahimovanın izahatını maraqla dinləyən qonaqlar Muzeydə türkdilli ədəbiyyatın görkəmli nümayəndəsi, Nizami ədəbi məktəbinin davamçısı, məşhur özbək şairi və mütəfəkkiri Əlişir Nəvainin  türkdilli ədəbiyyatın inkişafındakı rolu, Nizami “Xəmsə”sinə nəzirə yazması barədə məlumat alıblar.

Qonaqlar səmimi şəraitdə keçən görüş zamanı Özbək-Azərbaycan ədəbi əlaqələri barədə fikirlərini bölüşüb, Nəsimi və Füzuli yaradıcılığından nümunələr səsləndiriblər.

Muzeydən məmnunluq hissi ilə ayrılan alimlər Özbəkistan-Azərbaycan arasında elmi, ədəbi əlaqələrin bundan sonra da inkişaf edəcəyinə, qardaş ölkələrin ortaq türk mədəniyyətinə töhfələr verəcəyinə əminliklərini bildiriblər.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.