Azərbaycan Radiosunda “Axşam görüşləri” proqramının növbəti buraxılışı yayımlanıb.

Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynovun təqdimatında yayımlanan proqram 1 avqust - Azərbaycan Əlifbası və Azərbaycan Dili Gününə həsr olunub.

Verilişin qonağı Azərbaycan Milli Elmlər Akademiyasının Nəsimi adına Dilçilik İnstitutunun direktoru professor Nadir Məmmədli olub.

Akademik Rafael Hüseynov Azərbaycan Əlifbası və Azərbaycan Dili Gününün ana dilimizin qorunması, təbliği və latın qrafikalı müasir Azərbaycan əlifbasına keçidin başa çatdırılması məqsədilə təsis edildiyini söyləyib. Bildirib ki, bu əlamətdar gün 2001-ci il avqust ayının 9-da imzalanan rəsmi fərmana əsasən elan edilib. 2001-ci ildə latın qrafikalı Azərbaycan əlifbasına tam keçid təmin olunub. Ulu Öndər Heydər Əliyevin rəhbərliyi ilə ana dilimizə dövlət dili statusunun verilməsi və qorunması istiqamətində mühüm addımlar atılıb.

Onun sözlərinə görə, Azərbaycan dilinin və əlifbasının qorunub saxlanması və inkişaf etdirilməsi bu günümüzün və gələcəyimizin ən zəruri məsələlərindəndir. Çünki bu dil 50 milyondan artıq soydaşımızı birləşdirən və doğmalaşdıran atributdur.

Proqramda Mahmud Kaşğarinin XI əsrdə (1072–1074-cü illərdə) yazdığı "Divanü Lüğat-it-Türk" əsərinin türk dünyasının ilk ensiklopedik lüğəti, coğrafiya və folklor abidəsi olduğu vurğulanıb.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.