29 iyul 2026-cı il tarixində Özbəkistan Respublikası İslam Sivilizasiyası Mərkəzinin elmi katibi Rustam Cabbarov Nizami Gəncəvi adına Milli Azərbaycan Ədəbiyyatı muzeyini ziyarət edib.

Qonağı muzey ekspozisiyası ilə muzeyin “Rəqəmsallaşdırma, əlyazmaların tədqiqi və nəşr resursları” şöbəsinin müdiri, filologiya üzrə fəlsəfə doktoru Gülnar Əqiq tanış edib.

Rustam Cabbarov türk xalqlarının “Divanü-luğat-it-Türk”, “Kitabi-Dədə Qorqud”, “Qutadqu bilik” kimi ədəbi abidələri ilə bağlı heykəl, rəsm və digər eksponatları, Bakı, Naxçıvan, Gəncə və Şamaxı şəhərlərinin timsalında orta əsr Azərbaycan şəhərlərində intibah mədəniyyətinin yaranması, sənətkarlıq, ticarət, elm, mədəniyyət, memarlıq və incəsənətin  inkişafını əks etdirən ekspozisiya guşələrinə  maraqla tamaşa edib.

Azərbaycan ədəbiyyatının tarixi inkişaf mərhələlərini əks etdirən ekspozisiya ilə tanışlıq zamanı ziyarətçinin diqqətini xüsusilə dahi Azərbaycan şairi Nizami Gəncəviyə həsr olunmuş ekspozisiya zalları cəlb edib. Ona Nizami Gəncəvinin yalnız Azərbaycan ədəbiyyatının görkəmli nümayəndəsi deyil, həm də klassik Şərq poeziyasının ən qüdrətli simalarından biri olduğu, yaratdığı zəngin “Xəmsə” ənənəsinin sonrakı əsrlərdə Şərq ədəbiyyatının inkişafına mühüm təsir göstərdiyi barədə məlumat verilib. Bildirilib ki, Nizami ədəbi məktəbinin layiqli davamçılarından biri olan böyük özbək şairi Əlişir Nəvainin irsinə Azərbaycanda yüksək dəyər verilir. Qonaq həmçinin muzeyin ekspozisiyasında nümayiş etdirilən Əlişir Nəvaiyə həsr olunmuş rəsm əsərləri ilə də tanış olub.

Ekspozisiya ilə tanışlıqdan sonra Rustam Cabbarov muzeyin direktoru, akademik Rafael Hüseynovla görüşüb. Akademik qeyd edib ki, Azərbaycan-Özbəkistan münasibətlərinin bu gün dövlət başçılarının uzaqgörən siyasəti nəticəsində yeni inkişaf mərhələsinə qədəm qoyub. O, bildirib ki, Azərbaycan və Özbəkistan xalqları arasında qədim tarixə malik olan dostluq ənənələri  son illərdə ölkə rəhbərlərinin qarşılıqlı rəsmi və işgüzar səfərləri sayəsində daha da möhkəmlənmiş və bu səfərlər yeni əməkdaşlıq əlaqələrinin qurulmasına zəmin yaratmışdır.

Akademik Rafael Hüseynov Azərbaycan Respublikasının Prezidenti İlham Əliyevin ötən il noyabrın 15-də Özbəkistana rəsmi səfəri çərçivəsində Özbəkistan Prezidenti Şavkat Mirziyoyevlə birlikdə Daşkənddə İslam Sivilizasiyası Mərkəzini ziyarət etməsinin təsadüfi olmadığını və bu mərkəzin türk xalqları arasında mənəvi körpü yaradacaq mühüm əməkdaşlıq platformasına çevriləcəyini vurğulayıb.

Görüş zamanı yeni əməkdaşlıq perspektivləri ilə bağlı fikir mübadiləsi aparılıb. 

Sonra qonaqla xatirə fotoşəkilləri çəkdirilib.

Görüşün sonunda Rustam Cabbarov səmimi qəbula görə muzey rəhbərliyinə minnətdarlığını bildirib və muzeyin “Rəy kitabı”nda xoş təəssüratlarını ifadə edərək ədəbiyyat muzeyini “bütün Türk dünyasının iftixarına layiq olan mənəviyyat məskəni” adlandırıb.  

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.