Bu günlərdə rusiyalı soydaşımız, Sankt-Peterburq Repin adına İncəsənət Akademiyasının məzunu Kamilə Əhmədovanın yaratdığı rəsm əsərinin Nizami Gəncəvi adına Milli Azərbaycan Ədəbiyyatı Muzeyinə verilməsi ilə bağlı danışıqlar aparılıb.

Ədəbiyyat Muzeyinin direktoru, akademik Rafael Hüseynovun Sankt-Peterburq Repin adına İncəsənət Akademiyasının rektoru, akademik  Semyon İliç Mixaylovski ilə bu mövzuda olan məktublaşmaları uğurlu nəticələrə yol açıb.

Azərbaycan əsilli olub, Rusiyada böyüyüb təhsil almış Kamilə Munis qızı Əhmədova diplom işi mövzusu üçün “Seyid İmadəddin Nəsimi Şirvanşahlar sarayında” adlı  rəsm əsərini yaratmışdır.

Azərbaycan mədəni irsinə töhfə vermək məqsədilə bu dövrü seçdiyini vurğulayan gənc rəssam, əsərinin Bakıda – Nizami Gəncəvi adına Milli Azərbaycan Ədəbiyyatı Muzeyində qorunub saxlanmasını arzulayıb.

Akademik Rafael Hüseynovun Sankt-Peterburq İncəsənət Akademiyasının rektoru, akademik Semyon İliç Mixaylovskiyə ünvanladığı məktuba müsbət cavab alındıqdan sonra, əsər Azərbaycana gətirilərək Ədəbiyyat Muzeyinin “Elmi fondların mühafizəsi, tədqiqi və rəqəmsallaşdırılması”şöbəsinin müdiri, filologiya üzrə fəlsəfə doktoru Nərmin Əliyeva  tərəfindən təhvil alınıb.

Beləliklə, Ədəbiyyat Muzeyini ziyarət edən qonaqlar tezliklə böyük şair, filosof-alim Seyid İmadəddin Nəsiminin həyatına həsr olunmuş otaqda şairi Şirvanşahlar sarayı ilə bağlayan tarixi faktları dinləyə, gənc rəssam Kamilə Əhmədovanın mövzu üzrə yaratdığı nəfis tablonu seyr edə biləcəklər.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.