Nizami Gəncəvi adına Milli Azərbaycan Ədəbiyyatı Muzeyinə görkəmli Azərbaycan şairəsi Məhsəti Gəncəvinin tut ağacından yonulmuş heykəli hədiyyə edilib.

Bu barədə Muzeyin direktoru, akademik Rafael Hüseynov məlumat verib.

Akademik Rafael Hüseynov bildirib ki, heykəlin müəllifi heykəltəraş və rəssam İlqar Balayevdir. Sənətkarın hazırladığı əsər Məhsəti Gəncəvinin xatirəsinə həsr olunub. Heykəl yaxın günlərdə muzeydə Məhsəti Gəncəviyə həsr olunmuş ayrıca zalda öz yerini tapacaq.

Akademik Rafael Hüseynov Məhsəti Gəncəvinin irsinin öyrənilməsi istiqamətində son illərdə mühüm işlərin görüldüyünü söyləyib. Qeyd edib ki, şairənin yaradıcılığı ilə bağlı müxtəlif dillərdə kitablar nəşr edilib, elmi araşdırmalar aparılıb, dissertasiyalar və məqalələr hazırlanıb, onun obrazı təsviri sənətdə və musiqidə əksini tapıb. Tut ağacından hazırlanmış bu heykəl də Məhsəti Gəncəvinin xatirəsinə həsr olunmuş ekspozisiyanın yeni sənət nümunələrindən biri olacaq.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.