18 sentyabr 2026-cı il tarixində 2026-cı il üçün Mülki Müdafiə tədbirlər planına uyğun olaraq Muzeydə Mülki Müdafiə qüvvələrinin xəbərdarlıq və toplanış məşqi keçirilib.

Məşqin əsas məqsədi xəbərdarlıq sisteminin vəziyyətinin yoxlanılması, Mülki Müdafiə qüvvələrinin şəxsi heyətinin operativ xəbərdar edilməsi və müəyyən olunmuş əraziyə toplanması, eləcə də fövqəladə hallar zamanı çevik və düzgün fəaliyyət bacarıqlarının təkmilləşdirilməsi olub.

Məşqə hazırlıq çərçivəsində müvafiq əmr və məşq planı hazırlanıb, şəxsi heyətin xəbərdarlıq sxemi dəqiqləşdirilib, rabitə vasitələrinin vəziyyəti yoxlanılıb və digər təşkilati tədbirlər həyata keçirilib.

Saat 10:00-da başlayan məşq zamanı Mülki Müdafiə qüvvələrinin şəxsi heyətinin komplektləşdirilməsi, tabel əmlakı ilə təminatı və qarşıya qoyulmuş tapşırıqlar üzrə hazırlıq səviyyəsi yoxlanılıb.

Tədbirin giriş hissəsində Muzeyin Mülki Müdafiə Qərargahının rəisi İsmayıl Muxtarov çıxış edərək məşqin əhəmiyyətindən danışıb və fövqəladə hallar zamanı operativ fəaliyyətin vacibliyini vurğulayıb.

Daha sonra İsmayıl Muxtarov tərəfindən “Daşqın və güclü yağışlar zamanı fövqəladə hallar haqqında” məruzə təqdim olunub. Məruzədə güclü yağış və daşqınlar zamanı yarana biləcək təhlükələr, təhlükəsizlik tədbirləri, xəbərdarlıq və təxliyənin təşkili ilə bağlı məlumat verilib.

Saat 12:00-da məşq başa çatdırılıb, nəticələr təhlil olunaraq aşkar edilmiş nöqsanların aradan qaldırılması istiqamətində müvafiq tapşırıqlar verilib.

 Keçirilən məşq zamanı qarşıya qoyulmuş məqsədlərə nail olunub və Mülki Müdafiə qüvvələrinin xəbərdarlıq və operativ toplanış üzrə hazırlıq səviyyəsi qiymətləndirilib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.