Nizami Gəncəvi adına Milli Azərbaycan Ədəbiyyatı Muzeyinin Xaqani Şirvani adına Aran Regional filialında yazıçı-hüquqşünas Əlisəfa Azayevin 75 illik yubileyi münasibətilə tədbir keçirilib.

Tədbiri giriş sözü ilə açan Aran Regional filialının müdiri filologiya üzrə fəlsəfə doktoru, dosent Yaqut Bahadurqızı Əlisəfa Azayevin Azərbaycan ədəbiyyatında özünəməxsus yeri olduğunu vurğulayıb, onun zəngin yaradıcılığından, hüquqşünas kimi səmərəli fəaliyyətindən və milli-mənəvi dəyərlərin təbliğinə verdiyi töhfələrdən bəhs edib. Ə.Azayevin qanunlarımızı hər zaman ali tutan, savadlı hüquqşünas və əsl vətənpərvər olduğunu söyləyən Yaqut Bahadurqızı yazıçının əsərlərinin sujet xətti, ideyası, personajları haqqında maraqlı fikirlər səsləndirib. O, tədbirin görkəmli şəxsiyyətlərin irsinin öyrənilməsi və gələcək nəsillərə çatdırılması baxımından əhəmiyyətini qeyd edib.

Tədbirdə çıxış edən rayon ziyalıları Akif İbrahimov, Ramiz Cəfərov,  Əməkdar müəllim Məhəmmədəli Rəsulov, şəhid atası Hacı Bahadur Paşayev, şəhid anası Simuzər Bağıyeva, Müşgünaz Əliyeva, Sovet İttifaqı Qəhrəmanı Məmiş Abdullayevin qardaşı Ağasəməd Abdullayev, AYB-nin üzvləri qocaman jurnalist Tofiq Abdullayev, şair Abduləziz Xanəhmədoğlu, Anar Gülümsoy, Aida Adıgözəl, Nanəgül Həmidova, rayon MKS-nin əməkdaşı Şahnaz Məcidova və Qasım Hüseynov yazıçı Əlisəfa Azayevin həyat yolu, ədəbi irsi və yaradıcılığının əsas xüsusiyyətlərindən bəhs ediblər. Natiqlər yazıçının əsərlərində mənəvi dəyərlərin, vətənpərvərlik duyğularının, humanist ideyaların geniş əks olunduğunu qeyd edərək,  onun Azərbaycan ədəbiyyatına və hüquq elminə verdiyi töhfələri yüksək qiymətləndiriblər.

Daha sonra yazıçının həyat və fəaliyyətini əks etdirən slayd və videoçarx nümayiş etdirilib, Əlisəfa Azayevin bədii yaradıcılığında nümunələr səsləndirilib.

Tədbirdə müəllifin kitablarından ibarət sərgi nümayiş etdirilib, iştirakçılar  yazıçının yeni kitabları ilə yaxından tanış olublar. Akademik Rafael Hüseynovun Əlisəfa Azayevin Nizami Gəncəvi adına Milli Azərbaycan Ədəbiyyatı Muzeyi ilə fəal əməkdaşlığına görə və 75 illik yubileyi münasibətilə imzaladığı Fəxri Fərman da yazıçıya təqdim təqdim olunub.

Sonda Əlisəfa Azayev çıxış edərək oxucuların ona ünvanladığı sualları cavablandırıb, tədbirin təşkilatçılarına təşəkkürünü bildirib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.