Bakı şəhəri Səbail Rayon Mərkəzləşdirlimiş Kitabxana Sisteminin və Bakı Şəhər Mədəniyyət Baş İdarəsinin təşkilatçılığı ilə 29 sentyabr 2026-cı il tarixində xalq şairi Qabilin anadan olmasının 100 illiyinə  həsr olunmuş “Qabil dünyası: sözün və poeziyanın əbədi izi” adlı yubiley tədbiri keçirilib.

Tədbirdə Səbail Rayon MKS-nin direktoru Nərmin Xəlilova, AMEA Nizami Gəncəvi adına Ədəbiyyat İnstitutunun baş elmi işçisi, filologiya elmləri doktoru Mərziyyə Nəcəfova, AMEA Nizami Gəncəvi adına Ədəbiyyat İnstitutunun aparıcı elmi işçisi, filologiya üzrə fəlsəfə doktoru, dosent Nərgiz Cabbarlı, yazıçı-jurnailst Mahir Qabiloğlu və digər qonaqlar iştirak ediblər.

Tədbir xalq şairi Qabilin həyat və yaradıcılıq yolundan bəhs edən video-çarxın nümayişi ilə başlanıb.

Tədbirdə Nizami Gəncəvi adına Milli Azərbaycan Ədəbiyyatı Muzeyinin Beynəlxalq əlaqələr və regional layihələr üzrə direktor müavini Ləman Muxtarova və “Rəqəmsallaşdırma, əlyazmaların tədqiqi və nəşr resursları” şöbəsinin müdiri, filologiya üzrə fəlsəfə doktoru Gülnar Əqiq də iştirak ediblər. 

Ləman Muxtarovanın “Sözün səmimiyyət zirvəsi – Xalq şairi Qabil” mövzusunda məruzəsi dinlənilib. Məruzədə şairin bədii söz ustası olmaqla yanaşı, hər bir misrasında Vətən sevgisi, insana hörmət və ədalət ideyalarını lakonik dillə tərənnüm etməsi xüsusi vurğulanıb. Bildirilib ki, şair poeziyanı bəzəkli söz yığını deyil, həyatın özü, millətin dərdi və sevinci kimi görürdü. Çıxışda şairin yaradıcılığı ətraflı təhlil edilərək müəyyən məqamlara toxunulub. Şairin böyük zəhmət hesabına ərsəyə gətirdiyi və Dövlət mükafatına layiq görülmüş məşhur “Nəsimi” poemasının yaranma tarixi və əsərin fəlsəfi dərinliyi diqqətə çatdırılıb. Şairin yaradıcılığında real hadisələrə, həyat həqiqətlərinə əsaslanan “Anamın qanı”, eləcə də “Mahirlə söhbət”, “Qoy danışsın təbiət” kimi lirik və fəlsəfi əsərlərinin mahiyyəti haqqında söz açıb. Bundan başqa Qabilin hazırcavab şəxsiyyəti, yumoru və cəmiyyətin real nəbzini tutaraq əsərlərinə köçürmə məharəti vurğulanıb.

Gülnar Əqiq “Qabilin yaradıcılığında Qarabağ  mövzusu və işğal faciəsi” adlı məruzəsində qeyd edib ki, görkəmli şair Qarabağ münaqişəsini sadəcə ərazi itkisi kimi deyil, xalqın tarixi yaddaşına və milli mənəviyyatına vurulan ağır zərbə kimi qəbul edərək doğma yurdlarından didərgin düşmüş insanların taleyinə biganə qalmamış, onun “Çadırlara alışmayın”, “Hava necə olacaq”, “Çalma, qaboy” kimi şeirləri dağıdılmış şəhər və kəndlərin, itirilmiş torpaqların doğurduğu həsrət və kədərdən  yaranmışdır. G.Əqiq bildirmişdir ki, xalq şairi Qabil cəsarətli vətəndaş mövqeyindən çıxış edərək  işğal dövründə baş vermiş faciələrə biganə qalmamış, cəmiyyətdə hökm sürən laqeydliyi və mənəvi düşkünlüyü, milli həmrəyliyin zəifləməsini tənqid etmişdir. Məruzəçi vurğulayıb ki, Qabilin hələ işğal illərində yazdığı “Ümid sənədir ancaq, Azərbaycan əsgəri!” şeiri onun vətənpərvərlik duyğularının tərcümanı kimi 2020-ci il Vətən müharibəsi zamanı əsgərlərimizi qələbəyə ruhlandıran vətənpərvər nəğmələrdən biri olmuşdur.

Məruzələr kitabxana əməkdaşları və qonaqlar tərəfindən maraqla qarşılanıb, şairin irsinin gənc nəslə çatdırılmasının önəmi qeyd olunub.

Tədbirin sonunda şairin övladı Mahir Qabiloğlu atası haqqında xatirələrini bölüşərək tədbirin təşkilatçılarına və iştirakçılara minnətdarlığını bildirib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.