Nizami Gəncəvi adına Milli Azərbaycan Ədəbiyyatı Muzeyində nasir, şair, tərcüməçi, əməkdar incəsənət xadimi, Prezident təqaüdçüsü olmuş Vidadi Babanlının yüz illik yubileyinə həsr olunmuş “Susmuş vicdanları qələmilə qamçılayan adam” mövzusunda elmi seminar məşğələsi keçirilib.

Muzeyin “Ekspozisiyanın qurulması, təqdimi və rəqəmsal tətbiq” şöbəsinin müdiri, Əməkdar mədənyyət işçisi Tomiris Babanlı, ədibin xatirələrinə söykənərək Vidadi Babanlı ömrünün ən yaddaqalan, taleyüklü çağlarından bəhs etmiş, yaradıcılıq bioqrafiyasına nəzər salmışdır.

Tomiris xanım yazıçının erkən dövr və gənclik illərində həyatda rastlaşdığı acılı-şirinli hadisələrə işıq tutaraq onun bir şəxsiyyət kimi necə yetişməsindən bəhs edib.

Oğlunun ədəbiyyat üzrə təhsil almasına etiraz edən ataya qarşı çıxaraq, Vidadi Babanlı Bakı Dövlət Universitetinin filologiya fakültəsində təhsil almış, 1951-ci ildə Moskvada M.Qorki adına Ədəbiyyat İnstitutunun aspiranturasına daxil olmuşdur.

Məruzəçi onu da vurğulayıb ki, Vidadi Babanlının hələ erkən gənclik illərindən peşəkar yazıçı kimi yetişməsində şair, tənqidçi Cəfər Xəndadnın, xalq şairi Səməd Vurğunun, ədəbiyyatşünas, alim  Mircabbar Miryəhyayevin, Məmməd Cəfər Cəfərovun böyük rolu olmuşdur.

Moskvada təhsil alarkən Səməd Vurğunla bir daha qarşılaşan gənc Vidadi xalq şairinin rus yazıçıları ilə yaxın dostluğunun, Fadeyev, Simonov, Tixonov və başqaları ilə görüşlərinin yaxından şahidi və iştirakçısı olmuş və bu hadisələrin bir çox məqamlarını özünün “Gizlinlər” adlı avtobioqrafik əsərində ətraflı qələmə almışdır. 

Tomiris Babanlı çıxışında yazıçının ilk qələm təcrübəsi kimi 1947-ci ildə “Azərbaycan gəncləri” qəzetində çap olunmuş “Anam sən oldun” şeirindən başlayaraq sonralar "Dönüş", "Təbrizdə bir gecə" adlı poemalarının ərsəyə gəlməsi və nəşri haqqında ətraflı məlumat verib.

Məruzəçi ədibin “Gəlin”, “Həyat bizi sınayır” povestləri, ona böyük şöhrət qazandırmış “Vicdan susanda” romanı və digər əsərlərinin, kitablarının yaranma  tarixçələri haqqında da maraqlı məlumatları bölüşüb.

Seminar məşğələsi muzey əməkdaşlarının sual və çıxışları ilə davam edib.

Muzeyin “Rəqəmsal arxivləşdirmə, mədəniyyət irsinin tədqiqi və mənbəşünaslıq” şöbəsinin müdiri, filologiya üzrə elmlər doktoru Xatirə Bəşirli, “Süni intellekt tətbiqləri, komparativistika və bədii tərcümə” şöbəsinin müdiri, filologiya üzə elmlər doktoru Şəfəq Əlibəyli, elmi işçi Törəxanım Hüseynova və digərləri Vidadi Babanlı haqqında fikir və xatirələrini bölüşüblər.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.