Mədəniyyət Nazirliyinin Mədəniyyət üzrə Elmi-Metodiki və İxtisasartırma Mərkəzi Prezident İlham Əliyevin 14 yanvar 2026-cı il tarixli Sərəncamı ilə təsdiq edilmiş “Azərbaycan Mədəniyyəti- 2040” Azərbaycan Respublikasının Mədəniyyət Konsepsiyası”nın qarşıya qoyduğu məqsəd və hədəflərin işığında “Dilimiz milli-mədəni kimliyimizin təməlidir” mövzusunda silsilə seminarlardan ibarət yeni layihəyə start verib.

M.F.Axundov adına Azərbaycan Milli Kitabxanasında təşkil olunan növbəti seminarda xalq şairi, nasir, publisist, Milli Məclisin deputatı Sabir Rüstəmxanlı məruzə ilə çıxış edib.

Hələ erkən gənclik illərindən doğma Azərbaycan dilinin bütün qəlbi və qələmi ilə təəssübkeşi olmuş ədib, ana dilinin saflığı, ucalığı uğrundakı fəaliyyətindən bəhs edib.

Bildirilib ki, məhz bu mücadilə onu ədəbiyyatdan öncə jurnalistika ilə bağlamış, illər əvvəl “Azərbaycan” adlı qəzet çıxarmağa vadar etmişdir.

Sabir Rüstəmxanlı şeir, roman və pyeslərin  yaradıcılığında nə qədər üstünlük təşkil etsə də publisistikaya daim bağlı olduğunu qeyd edib.

Xalq şairi məşhur “Özümüzdən böyük sözümüz” kitabına və buradakı milli birlik yanğısı, öz kimliyinə, sözünə, folkloruna, tarixinə bağlılıq haqqında publisistik yazılara istinad edərək doğma ana dilini milli ruhu yetişdirən ən ali dəyər kimi izah edib.

İctimai-siyasi xadim vaxtilə, sovet Azərbaycanında ünsiyyət vasitəsi kimi doğma dilə qarşı olan etinasızlıqdan bəhs edərkən bugünkü müstəqil Azərbaycanda ana dili sevgisindən və onun dünya miqyasında tanıdılmasından danışıb.

Ədib, həmçinin, sovet rejimində türkdilli xalqların məcburən bir-birindən ayrı olduğunu vurğulamış, müasir dövrdə isə türk dünyasının birliyindən və ortaq türk dili və terminologiya bazasının yaradılması prosesindən bəhs etmişdir.

Sabir Rüstəmxanlı öz bədii yaradıcılığına, xüsusən, tarixi roman janrında yaratdığı əsərlərə də müraciət edərək bədii dilinin ədəbiyyatımızı yeni sözlərlə nə qədər zənginləşdirməsini vurğulayıb.

Maarifləndirici seminar maraqlı musiqi nömrələri və geniş auditoriyanın sual və çıxışları ilə davam edib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.