Azərbaycan Radiosunda “Axşam görüşləri” proqramının növbəti buraxılışı yayımlanıb.

Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynovun təqdimatında yayımlanan proqram yazıçı-publisist, tərcüməçi, SSRİ Jurnalistlər İttifaqının və SSRİ Yazıçılar İttifaqının üzvü Məmməd Oruca həsr olunub.

Akademik Rafael Hüseynov bildirib ki, Məmməd Oruc 1947-ci il mart ayının 8-də Vedibasar mahalının (Ermənistan SSR) Böyük Vedi kəndində doğulub. O, 1965-ci ildə ADU-nin Jurnalistika fakültəsinin jurnalistika şöbəsinə daxil olub, 1969-cu ildə bu təhsil ocağını bitirərək "Azərbaycan gəncləri" qəzetində əmək faəliyyətinə başlayıb və qısa bir müddətdən sonra Ədəbiyyat və İncəsənət şöbəsinə müdir təyin edilib. sgərlikdən qayıtdıqdan sonra  Məmməd Oruc Azərbaycan Dövlət televiziya və Radio verlişləri komitəsində əmək fəaliyyətini davam etdirib, redaktor, böyük redaktor və şöbə müdiri vəzifəsində çalışıb. 1980-ci ildə Azərbaycan Yazıçıları İttifaqının "Azərbaycan" jurnalına ədəbi işçi kimi işə qəbul olunub.

Diqqətə çatdırılıb ki, hələ orta məktəbdə oxuyarkən bədii yaradıcılığa başlayan Məmməd Orucun ilk şeirləri "Yüksəliş" və "Azərbaycan pioneri" qəzetlərində 1963–1965-ci illərdə nəşr olunub. Onun tələbə ikən qələmə aldığı və "Azərbaycan gəncləri" qəzetində çap etdirdiyi publisistika örnəklərinin, oçerklərinin bir qismi 1973-cü ildə "Gənclik" nəşriyyatında çap olunmuş "Ailə səadəti" kitabına daxil edilib.

Qeyd olunub ki, Məmməd Oruc 1970-ci ildən SSRİ Jurnalistlər İttifaqının, 1983-cü ildən isə SSRİ Yazıçılar İttifaqının üzvüdür.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.