Nizami Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynovun təqdimatında Azərbaycan Radiosunda “Axşam görüşləri” proqramının növbəti buraxılışı yayımlanıb.

Budəfəki proqram şair, yazıçı, tərcüməçi, kinossenarist, redaktor Vidadi Paşayevə həsr olunub.

Akademik Rafael Hüseynov bildirib ki, Vidadi Paşayev 1943-cü il sentyabr ayının 5-də Yardımlı rayonunda anadan olmuşdur. Gəncə şəhərində məktəbi qızıl medalla bitirdikdən sonra Azərbaycan Dövlət Universitetinin Filologiya fakültəsinə daxil olmuşdur. Moskvada Sergey Gerasimov adına Ümum-Rusiya Dövlət Kinematoqrafiya İnstitutunda təhsil almış və pedaqoji fəaliyyət göstərmişdir. Uzun müddət "Azərbaycanfilm" kinostudiyasında ssenarist, redaktor vəzifələrində çalışmışdır. Bakı, Moskva və Gəncədə yaşayıb fəaliyyət göstərmişdir. 

Vidadi Paşayevin fəaliyyəti barədə məlumat verən akademik Rafael Hüseynov qeyd edib ki, o, "Qobustan" jurnalında məsul katib, "Gənclik" nəşriyyatında baş redaktor, Azərbaycan Dövlət Radio və Televiziyasında İncəsənət və Radio teatrı şöbəsinin müdiri, Sergey Gerasimov adına Ümum-Rusiya Dövlət Kinematoqrafiya İnstitutunda müəllim, "Mozalan" satirik jurnalında bir sıra filmlərin ssenari müəllifi və ya redaktoru, "Azərbaycanfilm" kinostudiyasında bir sıra qısametrajlı, sənədli, elmi-kütləvi filmlərin müəllifi və ya redaktoru, "Aldanmış ulduzlar" operasının librettosunun müəllifi olmuşdur.

Diqqətə çatdırılıb ki, Vidadi Paşayev yüksək savadı, intellekt səviyyəsi, dəqiq məntiqi, maraqlı parlaq və cazibədar nitqiylə istənilən peşə, sənət adamını özünə cəlb edə bilirdi. Daxilən azad insan olan Vidadi Paşayev yurdunu, millətini çox sevirdi və Azərbaycanı müstəqil görməyi çox arzulayırdı.

Proqramda akademik Rafael Hüseynov Vidadi Paşayevlə bağlı xatirələrini bölüşüb, onun parlaq ömür yaşadığını və qəlblərdə daim yaşayacağını bildirib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.