Azərbaycan ədəbiyyatı ilə dərindən maraqlanan və bu sahədə məlumatlarını daim artırmağa çalışan Səudiyyə Ərəbistanının uşaq yazıçısı, mədəniyyət məsələləri üzrə məsləhətçi Əhməd Tabeici növbəti dəfə Nizami Gəncəvi adına Milli Azərbaycan Ədəbiyyatı Muzeyində olub.

Muzeyin zəngin ekspozisiyasını gəzməkdən mənəvi zövq aldığını deyən qonaq  “Dədə Qorqud”, “Koroğlu” dastanlarının ideyasını, ərəbdilli Azərbaycan şairlərinin ərəb mənbələrindəki yaradıcılığını  yüksək qiymətləndirib.

Əhməd Tabeici ekspozisiya ilə onu tanış edən Beynəlxalq əlaqələr və dünya muzeyləri ilə rəqəmsal resurs mübadiləsi şöbəsinin elmi işçisi Natəvan Bağırovaya Azərbaycan ədəbiyyatının keçmişi və bu günü haqqında suallarını verib, Nizami Gəncəvinin, Hüseyn Cavidin poetik irsində bəşər cəmiyyətinin vəhdəti, insan hüquqlarının qorunmasına dair fikirlərini bölüşüb.

Yazıçı Azərbaycan ədəbiyyatının keçdiyi zəngin inkişaf tarixinin mili-mənəvi dəyərlər üzərində qurulduğu qənaətində olduğunu söyləyib.   

Əhməd Tabeici muzeyin Azərbaycan-ərəb mədəni əlaqələrinin inkişafında xüsusi rol oynadığını qeyd edib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.