Nizami Gəncəvi adına Milli Azərbaycan Ədəbiyyatı muzeyində ICESCO-nun maarifləndirici tədbirləri çərçivəsində müasir muzey idarəçiliyi, ekspozisiya quruculuğu və mədəni irsin qorunmasına həsr olunmuş təlim keçirilib. 

Məruzəçi Azərbaycan Respublikası Mədəniyyət Nazirliyinin Heydər Əliyev Mərkəzlərinin koordinasiya şurasının üzvü, ICOM Azərbaycan Milli Komitəsinin katibi,  ICOM Milli Komitələr üzrə sədri Günay Səfərova təlimin əsas məqsədi kimi muzey və mədəni irs sahəsində çalışan mütəxəssislərin peşəkar bilik və bacarıqlarının artırılması, bu sahədə təhsil alan tələbələrin beynəlxalq təcrübə prinsiplərinin  öyrənilməsi məsələsini xüsusi vurğulayıb.

Təlimdə muzeyinin əməkdaşları ilə yanaşı Azərbaycan Dövlət Mədəniyyət və İncəsənət Universitetinin “Kulturologiya” fakültəsinin “Muzeyşünaslıq və turizm” kafedrasının tələbələri,  Azərbaycan Kooperasiya Universitetinin “Marketinq və menecment” fakültəsinin “Muzey, arxiv  işi və abidələrin qorunması” ixtisası üzrə təhsil alan tələbələr iştirak edib. İştirakçılar müasir muzey idarəçiliyi və strateji inkişaf, müasir ekspozisiya quruculuğu və sərgi dizaynı, mədəni irsin qorunması və davamlı idarə olunması, münaqişədən sonrakı ərazilərdə mədəni irsin bərpası kimi mövzular  ətrafında fikir mübadiləsi baş tutub. Sonda təlim iştirakçılarına yazılı tapşırıqlar verilib və qiymətləndirmə aparılıb.

Təlim zamanı ICOM-un müasir muzey anlayışı və beynəlxalq muzey təcrübəsi, eləcə də ICOMOS və ICCROM tərəfindən hazırlanmış münaqişədən və fəlakətlərdən sonra mədəni irsin bərpasına dair peşəkar tövsiyələrə istinad edilib.

Proqram iştirakçıların mövzular üzrə təcrübə mübadiləsini, praktiki nümunələrin müzakirəsini və əldə olunan biliklərin gündəlik peşə fəaliyyətində tətbiqi imkanlarının müəyyənləşdirilməsini də nəzərdə tutur.

Təlimin mədəni irsin qorunması, muzeylərin institusional inkişafı və davamlı idarəetmə sahələrində bilik və əməkdaşlığın gücləndirilməsinə töhfə verməsi gözlənilir.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.