Nizami Gəncəvi adına Milli Azərbaycan Ədəbiyyatı Muzeyinin əməkdaşları 23-24 Oktyabr tarixlərində Türkiyə Cümhuriyyətinin Qars şəhərində, Qafqaz Universitetində keçirilmiş “XIII Beynəlxalq Uşaq və Gənclik Ədəbiyyatı Simpoziumu”nda iştirak ediblər.

“Uşaq və gənclik ədəbiyyatının psixologiya ilə əlaqələri” problem müzakirəsi üzərində qurulan simpozium, yetişən nəslin hərtərəfli inkişafı istiqamətində bir çox mövzu panellərdən ibarət olmuşdur. Uşaq ədəbiyyatı, uşaq hüquqları, uşaq psixologiyası, uşaq dünyasında süni intellekt və rəqəmsallaşmanın rolu və s. mövzular üzrə dəyərli araşdırmalar təqdim olunmuşdur.

Muzeyin “Ekspozisiyanın qorunması, təqdimi və rəqəmsal tətbiq” şöbəsinin müdiri, Əməkdar mədəniyyət işçisi Tomiris Babanlı və “Virtual təqdimatlar, məktəblərlə  və ictimaiyyətlə iş” şöbəsinin müdiri, filologiya üzrə fəlsəfə doktoru Nəzmiyyə Yigitoğlu Azərbaycan uşaq ədəbiyyatı haqqında məruzələrlə çıxış etmişlər.

Tomiris Babanlı “Azərbaycan uşaq ədəbiyyatının tərcümə problemləri (Sevinc Nuruqızının yaradıcılığı əsasında) məruzəsində qeyd edib ki, müasir qloballaşma şəraitində çağdaş Azərbaycan uşaq ədəbiyyatının ingilis dilinə tərcüməsi milli ədəbi irsin beynəlxalq miqyasda tanıdılması ilə yanaşı, müxtəlif mədəniyyətlərarası dialoqun inkişafına da xidmət edir.

Nəzmiyyə Yigitoğlu isə simpoziuma təqdim etdiyi “Sevinc Nuruqızının hekayələrində müharibə çocuqları” araşdırmasında bu nəticəyə gəlir ki, əsərlərində hər kiçik detala obrazlı yanaşmaq, bədii mətni metaforik üslub üzərində qurub inkişaf etdirmək Sevinc Nuruqızı sentimentalizminin əsas mayasıdır.

Bir çox dünya ölkələrindən alim və ziyalıların qatıldığı simpoziumda iştirakçılara sertifikatlar təqdim olunmuşdur.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.