Azərbaycanın ədəbiyyat, mədəniyyət və mənəviyyat təqvimində oktyabr ayı rəmzi olaraq “Cavidlər ayı” adlandırılır. Cavid irsinin qorunması, təbliği, nəşri və tədqiqinə ömrünü həsr etmiş qızı, unudulmaz teatrşünas Turan Cavid də, dahi sənətkarın bəstəkar, rəssam, ədəbiyyatşünas, dramaturq oğlu, vur-tut 24 bahar yaşamış Ərtoğrol Cavid də, milli poetik teatrımızın banisi Hüseyn Cavid də məhz oktyabr ayında doğulublar.

Bu sözləri Nizami Gəncəvi adına Milli Azərbaycan Ədəbiyyatı Muzeyində keçirilən “Cavidin bitməyəcək qayıdışları” adlı elmi sessiyanı açan muzeyin direktoru, akademik Rafael Hüseynov deyib.

Tanınmış Cavidşünas alimlərin, Nizami muzeyi əməkdaşlarının və Hüseyn Cavidin Ev Muzeyinin kollektivinin iştirakı ilə böyük şairin anadan olmasının 144-cü ildönümündə keçirilən sessiyada akademik Rafael Hüseynov 1930-cu illərin sovet siyasi repressiyalarının qurbanı olmuş Hüseyn Cavidin müxtəlif dövrlərin yaratdığı maneələrə rəğmən ədəbi irsinin daim yaşadığını, yeni nəsillərlə müasir ola bilmək xüsusiyyətini vurğulayıb. Cavid irsinin bütün türk dünyasını qovuşduran dəyərlərdən olduğunu söyləyən akademik Rafael Hüseynov zəmanəmizdə həmin ədəbi yadigarların xüsusi aktuallıq kəsb etdiyini və türk birliyinin qüvvətlənməsinə xidmət edən mühüm amillərdən olduğunu bildirib.

Azərbaycanın Türkiyədəki Mədəniyyət Mərkəzinin rəhbəri Samir Abbasov çıxışında bu günlərdə birinci cildi çapdan çıxmış və yaxın aylarda daha iki cildi işıq üzü görəcək Cavid əsərlərinin türkcə külliyatının türk xalqları arasında mənəvi bağlılıqların daha da sıxlaşmasına töhfə olacağını deyib. Akademik Rafael Hüseynovun önsözü və redaktorluğu, dosent Mehdi Gəncəlinin tərcüməsində oxuculara təqdim edilmiş, Ulu Öndər Heydər Əliyevin xatirəsinə həsr olunmuş “Hüseyn Cavid. Pyeslər” kitabının xüsusiyyətlərindən bəhs edən S.Abbasov həmin nəşrdə yer alan pyeslərə artıq Türkiyə teatrlarının böyük maraq göstərdiyini və onları səhnələşdirilmək arzularının olduğunu diqqətə çatdırıb.

Bakı Dövlət Universitetinin Şərqşünaslıq fakültəsinin dosenti Əsmətxanım Məmmədova Hüseyn Cavid yaradıcılığında klassik Şərq poeziyası ənənələrinin davam etdirilməsi ilə yanaşı, bu irsin güclü müasirlik duyğusunun daşıyıcısı olmasına diqqət yönəldib.

Nizami Gəncəvi adına Milli Azərbaycan Ədəbiyyatı Muzeyinin elmi katibi Nuranə Əsədullayeva məruzəsində Hüseyn Cavidin “Azər” epopeyasında tarix və müasirlik məsələləri üzərində dayanıb.

Elmi sessiyada çıxış edən Azərbaycan Yazıçılar Birliyinin üzvü, dosent Fərqanə Zülfüqarova və filologiya elmləri doktoru Gülbəniz Babaxanova Cavid əsərlərinin müxtəlif dillərə tərcümələrinin onun sənətkar qüdrətinin daha geniş coğrafiyada tanınmasına səbəb olacağını ifadə ediblər.

Hüseyn Cavidin Türkiyədə bu günlərdə nəşr edilmiş külliyatının birinci cildi elmi sessiya iştirakçılarına və şairin ev muzeyinə təqdim olunub.

Elmi sessiyaya yekun vuran akademik Rafael Hüseynov Türkiyədə nəfis şəkildə nəşr olunmuş “Hüseyn Cavid. Pyeslər” kitabını söz, sənət və düşüncə tarixində silinməz izlər qoymuş dahi şairin türk dünyasına və bütövlükdə ədəbi-mədəni gerçəkliyə daha bir möhtəşəm qayıdışı kimi dəyərləndirib.

Hüseyn Cavid ailəsi adından şairin böyük qardaşı və ilk müəllimi Şeyx Məhəmməd Rasizadənin nəvəsi, jurnalist Nigar Hacıyeva çıxış edərək, doğumunun 144-cü ilində ehtiramla anılan əbədiyaşar sənətkarın xatirəsinin belə elmi məclislər və nəşrlərlə yüksək səviyyədə qeyd olunmasına görə minnətdarlığını bildirib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.