Nizami Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynovun təqdimatında Azərbaycan Radiosunda “Axşam görüşləri” proqramının növbəti buraxılışı yayımlanıb.

51 ildir fasiləsiz efirdə olan proqram bu dəfə ölkəmizin baş söz məbədi, Nizami Gəncəvi adına Milli Azərbaycan Ədəbiyyatı Muzeyinə həsr olunub.

Muzeyin yaranma tarixindən bəhs edən akademik Rafael Hüseynov bildirib ki, Ədəbiyyat Muzeyi Azərbaycan SSR Xalq Komissarları Sovetinin 1 noyabr 1939-cu il tarixli qərarı ilə təsis olunub. Muzeyin yerləşdiyi bina əvvəlcə 1860-cı illərdə karvansara kimi tikilib, 1915-ci ildə isə "Metropol" mehmanxanası kimi yenidən qurulub. İkinci Dünya müharibəsinin başlaması səbəbindən muzeyin ictimaiyyət üçün rəsmi açılışı təxirə salınıb və 14 may 1945-ci ildə baş tutub. Fəaliyyəti dövründə bina müxtəlif illərdə (1959, 1967 və 2004–2009-cu illərdə) əsaslı şəkildə bərpa edilib və yenidən qurulub.

Akademik Rafael Hüseynov vurğulayıb ki, həyatını muzeyə bağışlayan, peşəsinə vurğun olan və bu doğma məkana sədaqətli olan insanlar muzeydə yalnız işləmir, həm də yaşayırlar. Səadətlər içində bir xoşbəxtlik də bütün dünyanınkı sayılan dahilərin soydaşı, yurddaşı olmaqdır.

Onun sözlərinə görə, Ədəbiyyat Muzeyindəki elmi araşdırma və yaradıcılıq şöbələrinin sayı artıq 20-yə yaxınlaşır. Muzey əməkdaşları bu şöbələrdə sizin muzey səyahətlərinizin zövqlə keçməsi, buradan yeni biliklər alaraq ayrılmanız üçün daim çalışmaqdadır.  

Diqqətə çatdırılıb ki, Azərbaycan Yazıçılar Birliyinin sədri, Xalq yazıçısı Anarın Nizami Gəncəvi adına Milli Azərbaycan Ədəbiyyatı Muzeyi ilə bağlılığı onun gənclik illərinə və ilk əmək fəaliyyətinə söykənir. 1918-ci ildə Azərbaycan Xalq Cümhuriyyətinin ilk xalq səhiyyə və sosial təminat naziri, həmçinin Gəncə quberniyasının general-qubernatoru olmuş Xalq yazıçısı Anarın babası Xudadat bəy Rəfibəyli  indiki Ədəbiyyat Muzeyinin binasında yaşayıb.

Proqramda Xalq yazıçısı Anar anası - tanınmış şairə Nigar Rəfibəyli və babası Xudadat bəy Rəfibəyli ilə bağlı xatirələrini bölüşüb, muzeydə bələdçilik etdiyi illərdən, həmin dövrdə burada çalışan əməkdaşlardan danışıb. Bildirib ki, Ədəbiyyat Muzeyinin əsas missiyası qonaqları Azərbaycanın zəngin ədəbi irsi ilə tanış etmək olub. Hazırda muzey zəngin və müasir istiqamətdə fəaliyyətini davam etdirir.

“Axşam görüşləri” proqramında, həmçinin 60 ilə yaxındır bu mədəniyyət ocağında çalışan Fatma Əliyeva Ədəbiyyat Muzeyinə gəlişindən, buradakı fəaliyyətindən, görkəmli elm xadimləri ilə görüşlərindən, eləcə də "Ömün muzey səhifələri" adlı kitabından bəhs edib. 

Bundan başqa, Xalq şairi Sabir Rüstəmxanlı Ədəbiyyat Muzeyinin binası, eyvanlarındakı klassiklərin heykəlləri və burada qorunan ədəbi irs barədə fikrilərini bölüşüb. O, muzeyi “mənəvi enerjinin cəmləşdiyi, böyük ruhların bir yerdə yaşadığı məbəd” və ruhun əsl yuvası adlandırıb.

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.