Nizami Gəncəvi adına Milli Azərbaycan Ədəbiyyatı Muzeyində 8 Noyabr - Zəfər Günü münasibətilə “Zəfərli bayrağımız” mövzusunda elmi sessiya keçirilib.

Əvvəlcə Dövlət Himni səsləndirilib, Ümummilli Lider Heydər Əliyevin və şəhidlərimizin əziz xatirəsi bir dəqiqəlik sükutla yad edilib.

Tədbirdə “Bütün gələcək zəfərlərə müqəddimə” adlı məruzə ilə çıxış edən muzeyin direktoru, akademik Rafael Hüseynov 8 Noyabr Zəfərinə aparan tarixi yoldan bəhs edib, Zəfər bayramının Azərbaycan xalqının milli tarixində və yaddaşında xüsusi yer tutduğunu bildirib. O, tarixən xalqların həyatında müxtəlif bayramların mövcud olduğunu, lakin onların bir qisminin müəyyən siyasi dövrlərin təsiri ilə meydana gəldiyini və həmin dövrlərin sona çatması ilə öz əhəmiyyətini itirdiyini vurğulayıb. Əlavə edib ki, xalqın tarixi ənənələrindən və milli mübarizəsindən qaynaqlanan bayramlar isə nəsildən-nəslə ötürülərək yaşayır.

Akademik Rafael Hüseynovun sözlərinə görə, 44 günlük Vətən müharibəsində qazanılan tarixi Qələbənin əbədi təməli Ümummilli Lider Heydər Əliyevin uzaqgörən dövlətçilik strategiyası, ordu quruculuğu siyasəti və milli həmrəylik fəlsəfəsi ilə qoyulub. Ulu Öndərin müəyyənləşdirdiyi siyasi kursun Prezident İlham Əliyev tərəfindən uğurla davam etdirilməsi İkinci Qarabağ müharibəsində Azərbaycanın şanlı Qələbəsinin əldə olunmasında mühüm rol oynayıb.

Muzey direktoru qeyd edib ki, 2020-ci il noyabrın 8-də Şuşanın azad edilməsi ilə nəticələnən Zəfər Azərbaycan xalqının tarixində yeni mərhələnin başlanğıcı olub. O, bu qələbənin yalnız 44 günlük Vətən müharibəsinin nəticəsi olmadığını, Azərbaycanın təxminən 200 il ərzində üzləşdiyi parçalanma, işğal və təzyiqlərə qarşı mübarizəsinin tarixi yekunu kimi qiymətləndirilməsinin önəminə diqqət çəkib. Alim 2023-cü ilin sentyabrında həyata keçirilən antiterror əməliyyatı ilə ölkəmizin suverenliyinin bütün ölkə ərazisində tam şəkildə bərpa olunmasının bu qələbəni tam və tarixi Zəfərə çevirdiyini vurğulayıb.

Akademik Rafael Hüseynov çıxışında Azərbaycanın müstəqilliyinin ilk illərindən etibarən üzləşdiyi çətinliklərə, Ermənistanın təcavüzünə qarşı beynəlxalq müstəvidə aparılan mübarizəyə də toxunub. O, 2001-ci ildə Azərbaycanın Avropa Şurası Parlament Assambleyasına üzv qəbul edilməsindən sonra Ermənistanın Azərbaycana qarşı təcavüzünün beynəlxalq səviyyədə tanıdılması istiqamətində görülən işlərdən bəhs edib. Bu baxımdan, 2005-ci ildə Avropa Şurası Parlament Assambleyası tərəfindən qəbul edilmiş 1416 saylı qətnamənin əhəmiyyətini qeyd edərək, həmin sənədin Azərbaycanın haqlı mövqeyinin beynəlxalq ictimaiyyətə çatdırılmasında mühüm mərhələ olduğunu diqqətə çatdırıb.

Direktor bildirib ki, Azərbaycanın 44 günlük Vətən müharibəsində qazandığı qələbə xalqın milli birliyini və özünəinamını daha da gücləndirib. Müharibə dövründə bütün ölkə əhalisinin vahid məqsəd ətrafında səfərbər olunduğunu söyləyən natiq qeyd edib ki, Zəfər Azərbaycan vətəndaşlarının milli qürur və məğrurluq hissini yeni səviyyəyə yüksəldib. Bu qələbə müxtəlif sosial təbəqələrdən və peşə sahələrindən olan insanları birləşdirən güclü milli ideyaya çevrilib.

Akademik Rafael Hüseynov Zəfər bayramı ilə Dövlət Bayrağı Günü arasında sıx tarixi və mənəvi bağlılığın olduğunu da vurğulayıb. Bildirib ki, Azərbaycanın üçrəngli bayrağı uzun illər işğal altında olan ərazilərimizdə dalğalana bilməyib. 2020-ci ildə Şuşada, 2023-cü ildə isə Xankəndidə dövlət bayrağımızın ucaldılması Azərbaycanın ərazi bütövlüyünün və suverenliyinin bərpasının rəmzinə çevrilib. Bu baxımdan, Zəfər bayramı və Dövlət Bayrağı Gününün bir-birini tamamlayan milli bayramlar olduğunu diqqətə çatdırıb.

O, Azərbaycanın dövlətçilik tarixində üçrəngli bayrağın xüsusi yerə sahib olduğunu qeyd edərək onun yalnız dövlət rəmzi deyil, həm də milli istiqlal və azadlıq ideyasının daşıyıcısı olduğunu bildirib. Alim sovet hakimiyyəti illərində bayrağın Azərbaycan xalqının yaddaşında və milli düşüncəsində yaşadığını, müstəqilliyin bərpasından sonra yenidən dövlət rəmzi kimi ucaldıldığını qeyd edib.

Akademik Rafael Hüseynov çıxışının sonunda Azərbaycanın qazandığı Zəfərin gələcək nəsillər üçün də mühüm tarixi və mənəvi dəyər daşıyacağını vurğulayıb. O, xalqımızın milli birliyi və dövlət müstəqilliyini qorumasının vacibliyini qeyd edərək, Məhəmməd Əmin Rəsulzadənin “Bir kərə yüksələn bayraq bir daha enməz!” fikrini xatırladıb.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.