Noyabrın 1-də Rus Mədəniyyət Mərkəzində böyük rus şairi Sergey Yeseninin anadan olmasının 131-ci ildönümünə həsr olunmuş tədbir keçirilib.

Nizami Gəncəvi adına Milli Azərbaycan Ədəbiyyatı Muzeyinin Sergey Yesenin adına Rusiya Azərbaycan Ədəbi Əlaqələri Filialının da təmsil olunduğu tədbirdə filialın direktoru, filologiya üzrə fəlsəfə doktoru Natavan Mustafayeva da iştirak edib.

Yaradıcılıq gecəsində Rusiya Federasiyasının ölkəmizdəki Fövqəladə və Səlahiyyətli səfirliyinin üçüncü katibi Alimov Yeqor Aleksandroviç, Rusiya Mədəniyyət Mərkəzinin direktoru Qalina Manafova,  Misir Səfirliyinin mədəniyyət üzrə attaşesi, Mədəniyyət və Təhsil Əlaqələri Mərkəzinin direktoru, professor Tarek Əbül Toto, Əməkdar Mədəniyyət işçisi, incəsənət üzrə fəlsəfə doktoru, Azərbaycan Yaradıcılıq Fondu İdarə Heyətinin sədr müavini Rafiq Kaşanlı, Dünya Azərbaycanlıları Mədəniyyət Mərkəzinin prezidenti Rasim Məmmədov, Strateji Layihələr Mərkəzinin direktoru, “Ümidlə gəl” xeyriyyə layihəsinin rəhbəri Hacı Quliyev və digər rəsmi nümayəndələr iştirak ediblər.

          Tədbiri “Günay” Uşaq və Gənclər Teatrının rəhbəri Larisa Viktorovna Tarusova giriş sözü ilə açaraq qonaqları salamlayıb.

          Daha sonra Nizami muzeyinin Sergey Yesenin adına Rusiya Azərbaycan Ədəbi Əlaqələri Filialının rəhbəri, filologiya üzrə fəlsəfə doktoru Natavan Mustafayeva filialın yaranma tarixi və fəaliyyəti haqqında məlumat vermiş, “Sergey Yesenin və Azərbaycan” mövzusunda məruzə ilə çıxış etmişdir.

          Yaradıcılıq gecəsində qiraət ustası Rafiq Kaşanlının ifasında şairin “Qara adam” (“Черный человек”) poemasından parça, məktəblilərin ifasında “Əlvida Bakı” («Прощай Баку») və Yeseninin Bakıda qələmə aldığı poeziya nümunələrindən  parçalar səslənib.

          Daha sonra “Günay” Bakı Uşaq və Gənclər Teatrının təqdimatında ilk dəfə səhnəyə çıxan  “Rusiyanın qəlbi” («Душа России») adlı teatr tamaşası nümayiş olunub.

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.