Nizami muzeyində Xalq şairi Ramiz Rövşənin 80 illik yubileyinə həsr olunmuş ədəbi-musiqili tədbir keçirilib
Noy 20, 2026 | 15:10 / Yubileylər
Noyabrın 20-də Nizami Gəncəvi adına Milli Azərbaycan Ədəbiyyatı Muzeyində Xalq şairi, yazıçı, kinossenarist, tərcüməçi Ramiz Rövşənin 80 illik yubileyinə həsr olunmuş “Uşaqdan böyüyə hamının Ramiz Rövşəni” mövzusunda ədəbi-musiqili tədbir keçirilib.
Tədbiri giriş sözü ilə açan muzeyin direktoru akademik Rafael Hüseynov Xalq şairi Ramiz Rövşəni müasir Azərbaycan poeziyasının ən böyük söz ustalarından biri və xalqın mənəviyyat aləmini, həqiqətlərini dəqiq görən mütəfəkkir şair kimi dəyərləndirib.
Alim qeyd edib ki, Ramiz Rövşənin uşaq poeziyası sadə, səmimi və obrazlı dili ilə seçilir. Şair uşaq dünyasına böyükların nəsihəti ilə deyil, uşağın öz təxəyyülü və maraqları ilə yanaşır.
Rafael Hüseynov Azərbaycan tədrisi və ədəbiyyatı tarixində, yetişən nəslin maariflənməsində böyük şairlərin yaratdığı şeir nümunələrinin xüsusi rol oynadığını vurğulayıb. Qədim dövrdə Sədi Şirazinin “Gülüsta”ı, sonrakı dövrlərdə Mirzə Ələkbər Sabirin, Seyid Əzim Şirvaninin, Abdulla Şaiq və digər ədiblərin uşaqlara həsr olunmuş əsərlərinin balacaların zehnən və mənən formalaşmasındakı əhəmiyyətini qeyd edib. Akademik söyləyib ki, bu gün qocaman və dəyərli söz sahibi olan Ramiz Rövşənin şeirlərini əzbər deyən uşaqlar o misraları heç vaxt unutmayacaqlar. Onillər keçdikdən sonra həmin şeirləri yada salacaq və oradakı hikmətli mənlara varacaqlar.
Rafael Hüseynov Xalq şairinin yaşının artıq səksəni haqladığını qeyd etsə də, əlavə edib ki, Nizami muzeyini dəfələrlə ziyarət etmiş ədib bu gün də ruhən cavandır və nitqində, düşüncələrində gəncdir.
Alim Ramiz Rövşənin 80 illik yubileyinin qeyd edilməsini əsl ədəbiyyat bayramı hesab etmiş, Nizami muzeyində baş tutan bugünkü tədbiri isə xüsusi fərqləndirmişdir. O, əlavə etmişdir ki, “Ramiz Rövşən üçün də böyük xoşbəxtlikdir ki, onun şeirlərini belə gözəl, göyçək, həyata yeni başlayan uşaqlar əzbər söyləyirlər”.
Akademik məktəblilərə elm və bilik qazanmaq yolunda da tövsiyyələrini vermiş, onların da sıralarından Ramiz Rövşən, kimi, dahi Nizami, Füzuli, Sabir, Cavid kimi ədiblərin yetişməsini arzulamışdır.
Daha sonra tədbirdə Bakı şəhərinin müxtəlif məktəblərindən olan şagirdlər çıxış edərək şairin uşaqlar və yeniyetmələr üçün qələmə aldığı şeirlərini söyləmiş, sözlərinə bəstələnmiş mahnılar ifa etmişlər.
Tədbirdə 160 saylı Klassik Gimnaziyanın, Texniki və təbiət fənləri təmayüllü 3 saylı məktəb-liseyin, Ruslan Çerneqa adına 245 saylı, Məhəmmədhüseyn Şəhriyar adına 193 saylı, Elçin Şəmiyev adına 149, Bakı-Türk orta məktəbinin, Bakı Slavyan Universiteti nəzdində məktəb-lisey kompleksinin, Elçin Mansurov adına 88 saylı, 70 saylı məktəb-liseyin, Etibar Əliyev adına 162 saylı, Həzi Aslanov adına 175 saylı, tam orta məktəblərin, və digər təhsil ocaqlarının balaca istedadları çıxış etmişlər.
Tədbirin sonunda məktəblilər muzeyin Fəxri Fərmanları ilə təltif olunmuşlar.
© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.